Lleihau Niwed

Perchennog: Deborah Youngs, Dirprwy Is-ganghellor (Addysg a Phrofiad y Myfyrwyr)
Cymeradwywyd gan: Bwrdd Iechyd a Lles/y Dirprwy Is-ganghellor (Addysg a Phrofiad y Myfyrwyr)
Fersiwn 1.0
Cylch Adolygu: Bob tair blynedd neu'n gynt yn ôl yr angen yn sgîl newidiadau i ddeddfwriaeth, polisi neu gyngor cenedlaethol perthnasol.

Mae Prifysgol Abertawe wedi ymrwymo i hybu iechyd, diogelwch, lles a llwyddiant pob myfyriwr. Rydym yn cydnabod realiti’r defnydd o alcohol a chyffuriau yn y gymdeithas ehangach ac y gallai rhai myfyrwyr ddewis defnyddio sylweddau yn ystod eu cyfnod yn y Brifysgol.  Ein blaenoriaeth yw creu amgylchedd lle mae myfyrwyr yn teimlo'n ddiogel i geisio cymorth a gwneud penderfyniadau gwybodus am eu lles. Rydym am sicrhau bod myfyrwyr yn gallu cael gafael ar gymorth a gwybodaeth gywir gan deimlo’n hyderus y cânt eu trin ag urddas a pharch, a heb stigma na barnu diangen.

Mae ein hymagwedd at gyffuriau ac alcohol yn cael ei harwain gan egwyddorion lleihau niwed. Mae lleihau niwed yn ceisio lleihau'r niwed corfforol, seicolegol, cymdeithasol, academaidd a chyfreithiol sy'n gysylltiedig â defnyddio sylweddau.

Drwy'r ymagwedd hon, mae Prifysgol Abertawe yn ymrwymo i:

• Roi iechyd, diogelwch a lles myfyrwyr wrth wraidd ein hymateb.
• Darparu gwybodaeth ac addysg sy'n seiliedig ar dystiolaeth ynghylch cyffuriau ac alcohol.
• Cefnogi myfyrwyr i wneud penderfyniadau gwybodus am eu lles.
• Lleihau rhwystrau a allai atal myfyrwyr rhag ceisio cymorth.
• Hyrwyddo ymatebion ymyrraeth gynnar pan fo pryderon yn codi.
• Gweithio ar y cyd â phartneriaid Undeb y Myfyrwyr, darparwyr gofal iechyd, sefydliadau cymunedol ac awdurdodau perthnasol.
• Ymateb yn gymesur i'r risg sy'n gysylltiedig â defnyddio sylweddau.
• Meithrin diwylliant lle mae myfyrwyr yn teimlo'n ddiogel wrth geisio cymorth iddyn nhw eu hunain neu i eraill.

Rydym yn deall bod profiad pob myfyriwr o alcohol a chyffuriau yn wahanol ac yn bersonol. P'un a ydych chi am siarad, lleihau eich defnydd eich hun, gwneud dewisiadau mwy diogel neu gael gafael ar wybodaeth – mae cymorth ar gael. Os ydych chi'n poeni am eich defnydd eich hun o sylweddau, neu ddefnydd ffrind, neu os ydych chi'n profi effaith ymddygiad rhywun arall, rydym yn eich annog i gysylltu â ni.

Isod mae'r prif wasanaethau gan y Brifysgol a chyrff allanol y gall myfyrwyr eu defnyddio.

VERVE - Gwasanaeth Allanol Arbenigol

Mae VERVE  yn cynnig cymorth arbenigol ym maes cyffuriau ac alcohol ar draws Abertawe, Castell-nedd a Phort Talbot. Mae'r cymorth yn canolbwyntio ar yr unigolyn a gall gynnwys cyngor, asesiad, atgyfeirio a chefnogaeth barhaus yn unol ag amgylchiadau unigol.

Gall yr unigolyn ei hun wneud atgyfeiriad, neu gall gweithiwr proffesiynol wneud hynny ar ran yr unigolyn, ond rhaid ceisio cydsyniad yr unigolyn dan sylw i wneud cyswllt.I wneud atgyfeiriad neu i hunan-atgyfeirio, ewch i Gwneud Atgyfeiriad - Verve, cwblhewch y ffurflen a'i chyflwyno.

Canolfan Cyngor a Chymorth, Undeb Myfyrwyr Prifysgol Abertawe

Gwasanaeth cynghori a chymorth rhad ac am ddim, annibynnol a chyfrinachol i gefnogi myfyrwyr drwy gydol eu hastudiaethau. Gellir trefnu apwyntiadau neu wneud ymholiadau drwy dudalen we'r Ganolfan Cyngor a Chymorth.

Y Tîm Diogelu ac Ymateb i Ddatgeliadau

Tîm arbenigol o gynghorwyr sy'n rhoi arweiniad, cyngor a chymorth i helpu myfyrwyr i ymdrin â phryderon ynghylch risg, gan gynnwys cyffuriau, alcohol ac effaith ar les. I gael mynediad at gymorth drwy'r tîm, defnyddiwch ein  ffurflen ar-lein.

Y Gwasanaethau Lles ac Anabledd

Mynediad at wasanaethau cwnsela, cymorth iechyd meddwl a lles i fynd i’r afael â’r ffactorau ehangach a allai gyfrannu at ddefnyddio sylweddau neu y gall defnyddio sylweddau effeithio arnynt. Gellir cael cymorth drwy lenwi Ffurflen Cymorth i Fyfyrwyr.

Credwn fod myfyrwyr gwybodus mewn sefyllfa well i wneud dewisiadau mwy diogel.

Mae ein hymrwymiad yn cynnwys:

• Cynnal ymgyrchoedd ymwybyddiaeth a mentrau addysgol
• Darparu gwybodaeth hygyrch am risgiau sy'n gysylltiedig â sylweddau
• Gweithio mewn partneriaeth ag Undeb Myfyrwyr Prifysgol Abertawe i hybu lles myfyrwyr
• Cefnogi dysgu ac ymgysylltu rhwng cyfoedion
• Datblygu ymagweddau sy'n cael eu llywio gan ganllawiau cenedlaethol, ymchwil ac adborth gan fyfyrwyr
• Parhau i adolygu a gwella ein harferion drwy gymryd rhan mewn mentrau ar draws y sector a’r rhaglen achredu SOS Drug and Alcohol Impact

Anogir myfyrwyr i ddefnyddio gwasanaethau cymorth, lle bydd ymatebion yn canolbwyntio ar weithio i leihau niwed a hybu diogelwch. Mae'r ymagwedd hon yn adlewyrchu arferion gorau sy'n dod i'r amlwg yn y sector ac ymrwymiad Prifysgol Abertawe i gefnogi iechyd a llwyddiant myfyrwyr.

Pan ystyrir bod ymddygiad myfyriwr yn peri risg ddifrifol i’r myfyriwr ei hun neu i eraill – er enghraifft, mewn achosion sy'n ymwneud â chyflenwi, pryderon diogelu, neu'r effaith ar raglenni astudio wedi’u rheoleiddio – bydd angen i'r Brifysgol gymryd camau cymesur.

Ein nod yw cydbwyso atebolrwydd â chymorth a gofal, gan sicrhau bod ymyriadau yn gymesur, yn deg ac yn canolbwyntio ar leihau niwed lle bynnag y bo modd.

Rydym yn cydnabod bod defnyddio sylweddau yn fater iechyd a chymdeithasol cymhleth. Er bod yn rhaid i ymatebion effeithiol ganolbwyntio ar addysg, cymorth, atal a lles, bydd y Brifysgol hefyd yn sicrhau bod unrhyw gyfrifoldebau cyfreithiol yn cael eu bodloni. Mae hyn yn cynnwys achosion sy’n ymwneud â gweithgarwch troseddol neu lle mae myfyrwyr ar raglenni proffesiynol neu wedi’u rheoleiddio (e.e., Addasrwydd i Ymarfer). Byddwn yn gweithredu'n dryloyw ac yn onest, gan sicrhau bod myfyrwyr yn deall eu hawliau ac yn cael eu cefnogi drwy unrhyw broses gysylltiedig, gan gynnwys camau disgyblu lle bo angen.

Mae creu cymuned prifysgol fwy diogel yn unol â’n strategaeth lleihau niwed yn gyfrifoldeb a rennir. Bydd Prifysgol Abertawe yn gweithio ar y cyd â’r canlynol:

• Undeb Myfyrwyr Prifysgol Abertawe
• Y GIG a gwasanaethau gofal iechyd lleol
• Darparwyr cymorth arbenigol ym maes cyffuriau ac alcohol, e.e. VERVE
• Heddlu De Cymru a phartneriaid diogelwch cymunedol
• Staff academaidd a’r Gwasanaethau Phroffesiynol
• Y myfyrwyr eu hunain

Mae Prifysgol Abertawe wedi ymrwymo i ymagwedd dosturiol sy'n seiliedig ar dystiolaeth tuag at gyffuriau ac alcohol. Drwy gyfuno addysg, cymorth, atal ac ymyrraeth gymesur, rydym yn ceisio lleihau niwed, gwella lles a sicrhau bod pob myfyriwr yn gallu llwyddo a ffynnu wrth astudio yn Abertawe.