Wythnos Groeso Ionawr 2025

Mae'r Brifysgol yn seiliedig ar dair cyfadran, a byddwch chi'n ymuno â Chyfadran y Dyniaethau a'r Gwyddorau Cymdeithasol (FHSS). Mae pedair ysgol gan y Gyfadran:

• Yr Ysgol Diwylliant A Chyfathrebu

• Ysgol Y Gyfraith Hillary Rodham Clinton

• School Of Management

• Ysgol y Gwyddorau Cymdeithasol

Yn ystod eich amser yma, cewch eich addysgu yn eich ysgol gartref, neu eich ysgolion cartref os ydych yn rhan o raglen gydanrhydedd, ond rydym ni i gyd yn rhan o gymuned fywiog y gyfadran. Mae hyn yn golygu y bydd llawer o ddigwyddiadau cymdeithasol, academaidd a chymunedol yn cael eu cynnal i'r gyfadran gyfan drwy gydol y flwyddyn, lle cewch gyfle i gwrdd, cymdeithasu a dysgu gyda chydweithwyr a myfyrwyr o'r Ysgolion eraill.

Bydd llawer o gyfleoedd yn ystod yr wythnos sefydlu i gwrdd â'r bobl ar eich cwrs. Bydd sesiynau sefydlu eich adran yn cynnwys gweithgareddau a fydd yn rhoi cyfle i chi ryngweithio â llawer o bobl wahanol. Gwnewch yn siŵr eich bod yn cyfnewid manylion â phobl yr hoffech eu hadnabod yn well! Fel y gwelwch o amserlen yr wythnos groeso, mae digon o gyfleoedd i gwrdd â phobl eraill yn eich rhaglen, eich Ysgol ac yn y Brifysgol ehangach. Pan fydd y sesiynau addysgu'n dechrau, bydd rhagor o oriau cyswllt ffurfiol gennych pan fyddwch yn cwrdd â llawer o fyfyrwyr eraill - peidiwch â bod yn rhy swil i awgrymu cwrdd am baned neu aros i gael sgwrs ar ôl darlithoedd. Os ydych chi’n byw yn llety'r Brifysgol, bydd myfyrwyr eraill o'ch amgylch a chewch bob cyfle i wneud ffrindiau.

Byddwch yn cwrdd â llawer o’ch darlithwyr yn ystod y rhaglen sefydlu a drefnir gan eich adran. Bydd llawer o’r gweithgareddau cynlluniedig yn eich helpu i ddod i adnabod eich darlithwyr a dod i wybod ychydig amdanynt. Byddwch hefyd yn cwrdd â’ch mentor academaidd yn ystod eich wythnos sefydlu.

Bydd eich mentor yn goruchwylio eich cynnydd academaidd drwy gydol eich gradd a’ch helpu i’ch tywys drwy eich astudiaethau. Unwaith bydd yr addysgu’n dechrau, ynghyd â’r addysgu ar eich amserlen, bydd eich darlithwyr yn cynnal oriau swyddfa rheolaidd lle byddwch yn gallu cysylltu â nhw i drafod cwestiynau neu bryderon – neu hyd yn oed i gael sgwrs am rywbeth diddorol a drafodwyd yn y dosbarth!

Pan fyddwch chi’n cychwyn yn y Brifysgol caiff tiwtor personol ei bennu i chi, fel arfer aelod o staff addysgu yn eich adran. Bydd yn cysylltu â chi trwy eich cyfeiriad e-bost y Brifysgol er mwyn trefnu cyfarfodydd drwy gydol y tymor a bydd modd iddo eich cefnogi chi gydag ystod o ymholiadau gan gynnwys; cyfeiriadu i gymorth bugeiliol, arweiniad academaidd, cyflogadwyedd a mwy.

Gallwch gael enw eich tiwtor a’i fanylion cyswllt drwy fewngofnodi i’ch tudalen unigol ar y fewnrwyd, o dan Manylion Cwrs > Cysylltiadau Cwrs. 

Tîm Gwybodaeth Myfyrwyr eich Ysgol fydd eich cyswllt cyntaf ar gyfer cael cyngor, cyfeirio ac ymholiadau cyffredinol. Cewch gyfle i gwrdd â'r tîm yn ystod yr Wythnos Groeso, yn y sesiynau Camau Cyntaf ac yn nigwyddiadau cymdeithasol eich Ysgol.

Gallwch gysylltu â nhw drwy e-bost ac ar ôl i chi gyrraedd, galwch heibio i'w gweld yn Nerbynfa llawr tir, Techniwm Digidol ar Gampws Singleton, Derbynfa adeilad yr Ysgol Reolaeth ar Gampws y Bae.

Dyma atebion i rai cwestiynau cyffredin yn y Gyfadran. Os oes gennych ragor o gwestiynau, mae croeso i chi anfon e-bost atom ni!

Mae Prifysgol Abertawe yn cydnabod y gall fod cyfrifoldebau gofalu gan lawer o’n myfyrwyr. Ein nod yw darparu amgylchedd croesawgar ar gyfer ein holl fyfyrwyr ac rydym am dy gefnogi i gyflawni llwyddiant.

Er ein bod yn cefnogi ac yn hyrwyddo gweithgarwch addysgol, mae’r Brifysgol yn weithle ac nid yw ei hadeiladau, ei gweithgareddau a’i mesurau rheoli risg ar gyfer plant yn gyffredinol. Sylwer na ddylid dod â phlant i fannau dysgu ac addysgu (oni bai fod digwyddiad wedi’i drefnu): Plant ym Mangreoedd y Brifysgol  

Mae Meithrinfa Undeb y Myfyrwyr yn darparu gofal plant fforddiadwy o safon ar Gampws Singleton i blant rhwng 3 mis oed tan eu pen-blwydd yn 8 oed. Am ragor o wybodaeth am ofal plant ac ysgolion, gweler tudalennau gwe’r Cyngor:

Cyngor Dinas a Sir Abertawe

Cyngor Castell-nedd Port Talbot

Os wyt ti'n fyfyriwr yn y DU, edrychwch ar ganllaw'r Brifysgol i gyllid myfyrwyr ar gyfer myfyrwyr sy'n rhieni. Rydym hefyd wedi llunio Canllaw Gwybodaeth i Deuluoedd cynhwysfawr i’n myfyrwyr rhyngwladol.

Am wybodaeth a chymorth i fyfyrwyr beichiog, cer i’n tudalennau gwe.

Os oes cwestiynau gennyt ti ynghylch yr wybodaeth yn yr e-bost hwn, cysyllta â thîm cymorth dy Gyfadran.

Mae ymaelodi â chymdeithas yn gallu bod yn ffordd wych i gyfranogi ym mywyd y myfyrwyr a chwrdd â phobl o’r un natur. Mae ystod o gymdeithasau yn Undeb Myfyrwyr Abertawe, mewn gwirionedd mae rhywbeth ar gyfer pawb! Mae gan ein hadrannau academaidd eu cymdeithasau eu hunain sydd wedi’u harwain gan fyfyrwyr ac sy’n cymryd rôl weithgar wrth drefnu gweithgareddau cymdeithasol. Er mwyn gweld rhestr lawn o gymdeithasau y gallwch ymaelodi â nhw, a’u manylion cyswllt, edrychwch ar dudalen we cymdeithasau Undeb y Myfyrwyr!

Bydd eich sesiwn 'Camau Cyntaf' yn ystod yr Wythnos Groeso yn cyflwyno'r prif blatfformau TG rydym yn eu defnyddio yn y Brifysgol, a bydd eich darlithwyr yn rhoi gwybod i chi am unrhyw feddalwedd benodol i'r cwrs y byddwch yn ei defnyddio wrth astudio.

Cyn i chi gyrraedd, gallech chi baratoi drwy lawrlwytho Canvas, ein platfform dysgu digidol. Bydd tudalennau ar Canvas ar gyfer pob un o'ch modiwlau, lle bydd llawer o'r adnoddau dysgu y bydd eu hangen arnoch chi'n cael eu storio. Hefyd, bydd gennych fynediad at Hyb yr Ysgol ar Canvas, sef eich siop dan yr unto ar gyfer gwybodaeth, adnoddau, manylion cyswllt a digwyddiadau allweddol yn yr Ysgol, y Gyfadran a'r Brifysgol drwy gydol eich astudiaethau.

Mae'r Brifysgol yn cynnal llawer o gyfarfodydd, cynadleddau a sesiynau gwybodaeth drwy Zoom, felly mae'n syniad da lawrlwytho hwn. Ar ôl i chi gofrestru, byddwch yn gallu mewngofnodi gan ddefnyddio eich cyfrif yn y Brifysgol ar eich cyfrifiadur, eich llechen neu eich ffôn. Os nad ydych yn gyfarwydd â Zoom, mae'r Brifysgol wedi llunio gwybodaeth bellach a chanllawiau i ddefnyddwyr.

Ewch i dudalennau gwe Cofrestru y Brifysgol er mwyn derbyn arweiniad ar sut i gofrestru.

Os byddwch chi’n profi anawsterau o ran cofrestru ar-lein, e-bostiwch MyUniHub a bydd y tîm yn hapus i’ch helpu chi.