Datganiad Canlyniadau Graddau

Dangosir proffil dosbarthiadau graddau Prifysgol Abertawe ar gyfer blynyddoedd academaidd 2017/18 i 2023-24 yn y tabl isod:

Canlyniadau Gradd

Mae'r data'n dangos bod proffil y Brifysgol o Anrhydeddau Dosbarth Cyntaf ac Anrhydeddau Ail Ddosbarth Uwch gyda'i gilydd wedi gostwng 4.5% o gymharu â 2022/23, ond bod cynnydd yn y dosbarthiadau 2:1 ond mwy o ostyngiad yn y dosbarthiadau 1af, fel mae'r data uchod yn ei ddangos, gan effeithio ar y ganran gyfun. Cynyddodd Anrhydeddau Ail Ddosbarth Uwch 1.5% ac mae Anrhydeddau Ail Ddosbarth Is wedi cynyddu 0.9%. 

Er bu gostyngiad bach yn yr Anrhydeddau Dosbarth Cyntaf ac Anrhydeddau Ail Ddosbarth Uwch gyda'i gilydd, mae'r Brifysgol wedi parhau i gynnal safonau a gwella ansawdd rhaglenni'r Brifysgol, er mwyn sicrhau bod myfyrwyr yn cael y cyfle gorau i raddio gyda graddau Dosbarth Cyntaf neu Ail Ddosbarth Uwch ac i'w galluogi i sicrhau cyflogaeth i raddedigion. 

Ar gyfer pob rhaglen, mae deilliannau dysgu ac asesu yn cael eu mapio'n glir yn erbyn Cod Ansawdd yr Asiantaeth Sicrhau Ansawdd (ASA), yn bodloni gofynion Cyrff Proffesiynol, Statudol a Rheoliadol (PSRB), yn ystyried datganiadau meincnod pwnc ASA ac yn cyd-fynd â'r Fframwaith ar gyfer Cymwysterau Addysg Uwch a Fframwaith Credyd a Chymwysterau Cymru. Mae hyn yn rhoi sicrwydd bod safonau gradd yn cael eu cynnal a bod arbenigwyr allanol, (cynrychiolwyr PSRB, defnyddwyr gwasanaeth, myfyrwyr, cyflogwyr, rhanddeiliaid) yn hysbysu ac yn sicrhau ansawdd ein rhaglenni.

Mae Polisi Asesu, Marcio ac Adborth y Brifysgol (diweddarwyd 2024) yn darparu egwyddorion asesu a gofynion ac yn hyrwyddo gwelliant mewn arferion asesu. Mae'r Polisi yn cynnwys gofynion ar gyfer marcio a dylunio asesiadau, a dolenni i reoliadau'r Brifysgol ar gyfer Asesu a Dyfarnu. Mae dylunio asesiadau a marcio hefyd yn cael ei oruchwylio gan Arholwyr Allanol arbenigol, sy'n adolygu ac yn cymeradwyo dyluniad asesiadau i sicrhau cysondeb a dilysrwydd ac yn darparu adroddiad blynyddol ar brosesau asesu ac yn mynychu'r Byrddau Arholi perthnasol.

Mae newidiadau diweddar i'r polisi wedi mynd i'r afael â'r meysydd allweddol canlynol:

• Cymedroli maint sampl ac egluro'r gofynion sylfaenol
• Eglurhad ar farciau asesiadau a marciau modiwlau sy'n diweddu â 9
• Gwelliannau i hyrwyddo cynhwysiant hiliol yn fwy effeithiol
• Gwelliannau i sicrhau safonau yng ngoleuni Deallusrwydd Artiffisial Cynhyrchiol
• Eglurhad / Gwelliant o ran gweithio gyda phartneriaid

Mae Cod Ymarfer ar gyfer Dysgu, Addysgu ac Asesu helaeth ac Academi Dysgu ac Addysgu Abertawe ac Academi Cynwysoldeb Abertawe yn ategu’r gwaith o weithredu’r polisi hwn. 

Yn ogystal, mae'n ofynnol i'r holl staff academaidd sy'n newydd i fyd addysg uwch gwblhau'r Tystysgrif Ôl-raddedig mewn Addysg Uwch, lle cânt eu cyflwyno i God Ansawdd yr ASA, pob agwedd ar ddylunio rhaglenni ac asesu a phrosesau sicrhau ansawdd. Mae Academi Dysgu ac Addysgu Abertawe yn darparu gweithdai pellach sy'n ymdrin â phob agwedd ar asesu a marcio.

Uniondeb Academaidd

Mae'r Brifysgol wedi cynnal rhaglen o weithgarwch gwella dan ymbarél Ymlaen gydol 2022/23 a 2023/24.  Fe wnaeth gwaith yn 2022/23 nodi Uniondeb Academaidd fel maes ar gyfer gwella a sefydlwyd gweithgorau dynodedig ar gyfer y 4 thema ganlynol: 

• Briffio Staff
• Polisi a Rheoliadau
• Sgiliau Uniondeb Academaidd Myfyrwyr
• Prosesau, Cysondeb a Systemau

Roedd rhaglen Ymlaen yn helpu i ennyn diddordeb myfyrwyr mewn gwaith ar Uniondeb Academaidd yn ogystal ag ymgynghori â staff ar draws y sefydliad. 

Gydol 2023/24, cafodd allbynnau o'r gweithgorau uchod eu cyflwyno ar draws y sefydliad gyda'r canlyniadau allweddol canlynol:

• Cysoni polisi Amgylchiadau Esgusodol ar draws y tair cyfadran, gan sicrhau bod y profiad i fyfyrwyr yn gyson, gan gynnwys amserlenni a phrosesau ar gyfer amgylchiadau esgusodol.
• Adolygu a diwygio rheoliadau camymddwyn academaidd i leihau nifer yr achosion (cyflwyno arfer academaidd gwael) a llai o amser prosesu achosion a chanlyniadau (gan ganiatáu i gyfadrannau ddelio â mân achosion)
• Creu a lansio Hyb Uniondeb Academaidd ar gyfer staff ar blatfform Canvas sy'n cynnwys adnoddau ac arweiniad i staff 
• Adolygu a diweddaru Rôl Arweiniol Uniondeb Academaidd y Brifysgol i gefnogi'r gwaith hwn ar draws y sefydliad ar gyfer y dyfodol agos

Mae llywodraethu academaidd yn hanfodol er mwyn diogelu gwerth cymwysterau a ddyfernir gan y Brifysgol. Mae Pwyllgor Addysg y Brifysgol yn gyfrifol am oruchwylio Ansawdd a Safonau ac mae'n darparu adroddiad blynyddol i Gyngor y Brifysgol (Llywodraethwyr), sy'n rhoi sicrwydd iddynt fod ansawdd a safonau'n cael eu cynnal. Cynhaliwyd Adolygiad Gwella Ansawdd yr Asiantaeth Sicrhau Ansawdd (QAA) ym mis Tachwedd 2020, yn unol â gofynion Fframwaith Asesu Ansawdd Cymru. 

Law yn llaw â'r adolygiad hwn, gofynnir i'r Llywodraethwyr gadarnhau nifer o ddatganiadau yn flynyddol fel rhan o Fframwaith Asesu Ansawdd CCAUC i Gymru, gan gynnwys, ar gyfer darparwyr sydd â phwerau dyfarnu graddau, bod safonau'r dyfarniadau maen nhw'n gyfrifol amdanynt wedi'u gosod a'u cynnal yn briodol. 

Er mwyn cynorthwyo'r Llywodraethwyr i sicrhau'r sicrwydd hwnnw, mae dull adrodd sy'n bwydo drwy'r sefydliad drwy Bwyllgorau a Byrddau Sicrhau Ansawdd ar lefel Cyfadran/Ysgol a Sefydliad i Bwyllgor Addysg y Brifysgol. Mae Bwrdd Partneriaeth Cydweithredol hefyd, sy'n goruchwylio'r holl drefniadau Partneriaeth. Gyda'i gilydd, mae'r strwythur llywodraethu hwn yn sicrhau bod grym yn nwylo'r cyrff lleol, ond mae gan y Brifysgol oruchwyliaeth glir o ansawdd a safonau. Gydol blwyddyn academaidd 2023/24, cynhaliwyd ail gam adolygiad o strwythurau llywodraethu gyda strwythur a phroses newydd wedi'u hamlinellu ar gyfer 2024/25. 

Mae proses Adolygiad Ansawdd y Brifysgol yn cynnwys Adolygiad Blynyddol o Fodiwlau, Adolygiad Blynyddol o Raglenni ac Adolygiadau Ansawdd sydd wedi'u cynllunio i adolygu'n fanwl feysydd sydd angen cymorth, heb leihau'r gwaith craffu mewn meysydd perfformiad uchel. Gyda'i gilydd, mae'r dulliau hyn yn sicrhau bod gan y Brifysgol oruchwyliaeth glir a deialog reolaidd am ansawdd a safonau ei darpariaeth, sy'n sail i ganlyniadau graddau. 

Mae'r Arholwyr Allanol a'r Arbenigwyr Pwnc Allanol yn hanfodol yn y gwaith o ddylunio, cymeradwyo ac adolygu rhaglenni yn barhaus, ac maen nhw'n cymryd rhan ym mhob dyluniad neu adolygiad o raglenni. Ar lefel sefydliad, mae'r Bwrdd Dilyniant a Dyfarniadau yn derbyn adroddiad Arholwr Allanol ar lefel Cyfadran/Ysgol ac yn darparu adroddiad sefydliadol i Bwyllgor Addysg y Brifysgol. Mae'n ofynnol i gyfadrannau/ysgolion ddarparu ymateb ar lefel leol, ac mae'r Brifysgol yn goruchwylio ac yn ymateb i unrhyw gamau sy'n cael eu cymryd mewn ymateb i Adroddiadau Arholwr Allanol ar lefel sefydliad.

Gydol 2023/24, mae'r prosesau ansawdd uchod wedi cynnal adolygiadau ar raddfa lawn i sicrhau eu bod yn parhau i fod yn addas at y diben, yn effeithlon ac yn effeithiol. Mae hyn wedi arwain at weithredu fframwaith sicrhau ansawdd sydd newydd ei ddiffinio yn 2024/25 i gefnogi dull gwella parhaus.

Mae rheoliadau dosbarthiad Prifysgol Abertawe yn cael eu cyhoeddi yn y Rheoliadau Academaidd. Mae'r rheoliadau hyn yn cael eu hadolygu'n barhaus.

Fel arfer, bydd dosbarth gradd yr ymgeisydd yn cael ei bennu gan y marc cyfartalog wedi'i bwysoli ar gyfer pob modiwl, gan gynnwys marciau'r methiannau a oddefir, gan gyfrannu at yr asesiad anrhydedd gan ddefnyddio'r ffiniau dosbarthiad canlynol:

Band 3: Y marciau gorau a enillwyd mewn 80 credyd a ddilynwyd ar Lefel 6, â phwysiad o 3
Band 2: Y marciau Lefel 6 o’r 40 credyd a ddilynwyd sy’n weddill a’r marciau gorau a enillwyd mewn 40 credyd a ddilynwyd ar Lefel 5, â phwysiad o 2
Band 1: Y marciau a enillwyd yn y credydau Lefel 5 a ddilynwyd sy’n weddill, â phwysiad o 1

Yna defnyddir fformiwla i gyfrifo'r cyfartaledd dosbarthiad gradd.

Cyfle: Gellir ystyried myfyrwyr sydd o fewn 2% o'r ffin ddosbarthu i'w dyrchafu i'r dosbarthiad nesaf os ydyn nhw'n bodloni'r meini prawf canlynol.

Yr Egwyddor Mwyafrif: Er mwyn dyfarnu’r dosbarthiad uwch, mae’n rhaid bod myfyriwr wedi ennill marciau ym mand y dosbarthiad uwch mewn modiwlau â phwysiad credydau gwerth o leiaf hanner y rheiny sy’n cyfrannu at ddosbarthiad y radd.

Yr Egwyddor Cyflymder Gadael: Bydd Bwrdd Dilyniant a Dyfarnu'r Brifysgol yn ystyried cyfartaledd y flwyddyn astudio olaf heb bwysiad. Pan fydd cyfartaledd blwyddyn olaf myfyriwr ym mand y dosbarthiad uwch, bydd Bwrdd Dilyniant a Dyfarnu'r Brifysgol yn dyfarnu gradd yn y dosbarth uwch fel arfer.

Mae'r Brifysgol yn ymgymryd â rhaglen wella o'r enw Ymlaen. Mae'n canolbwyntio ar sicrhau newid sylweddol mewn effeithiolrwydd sefydliadol dros y tair blynedd nesaf gan sefydlu diwylliant o welliant parhaus y gellir ei sicrhau yn y dyfodol.  Yn 2022/23, canolbwyntiodd y rhaglen ar y 4 maes allweddol canlynol:

• Amgylchiadau Esgusodol
• Uniondeb Academaidd
• Mentora Academaidd
• Cyfathrebu Myfyrwyr

Gydol 2023/24, canolbwyntiodd y rhaglen ar sefydlu gwaith y 4 maes a grybwyllir uchod a meysydd ychwanegol o gyfathrebu â myfyrwyr a phorth i wasanaethau a systemau a phrosesau myfyrwyr i gefnogi staff a myfyrwyr. Mae canlyniadau'r rhaglen Ymlaen yn cynnwys:

• Proses a strwythur Amgylchiadau Esgusodol cyson ar draws pob cyfadran a'r Coleg.
• Sefydlu a gwreiddio Fframwaith Tiwtora Personol diwygiedig ar draws y sefydliad ynghyd â dechrau Prosiect Diwygio'r Cwricwlwm ar draws y sefydliad.
• Mae rheoliadau a phrosesau newydd a diwygiedig o ran achosion Uniondeb Academaidd yn golygu bod penderfyniadau ar achosion yn digwydd yn gynt. Mae'r Ganolfan Llwyddiant Academaidd wedi cyflwyno cynllun Llysgennad Uniondeb Academaidd i barhau i gefnogi Uniondeb Academaidd ar draws y sefydliad.
• Adolygiad o brosesau cyfathrebu myfyrwyr fel y gellir datblygu proses symlach newydd ar y cyd â chyfadrannau er mwyn helpu i wella'r ffordd o rannu negeseuon i fyfyrwyr.

Data canlyniadau graddau yw un o'r setiau allweddol o ddata a adolygir gan raglenni fel rhan o Adolygiad Modiwlau a Rhaglenni Blynyddol parhaus ac Adolygiadau Ansawdd manylach. Mae arferion effeithiol yn cael eu nodi fel mater o drefn drwy'r prosesau ansawdd hyn, a amlygir yn yr Adroddiadau Trosolwg Ansawdd Cyfadran a amlinellwyd yn flaenorol, yn ogystal â thrwy dudalennau gwe SALT.

Fel y soniwyd uchod, mae'r sefydliad wedi cychwyn Prosiect Diwygio'r Cwricwlwm gyda'r nod o sicrhau cydraddoldeb yn y ddarpariaeth ar draws y sefydliad, waeth beth fo'r ddisgyblaeth, wrth gynnal arferion dysgu, addysgu ac asesu o ansawdd uchel sy'n cael eu diogelu at y dyfodol ac yn paratoi ein myfyrwyr yn effeithiol ar gyfer eu gyrfaoedd dewisol.  Bydd y gwaith hwn yn parhau ym mlwyddyn academaidd 2024/25.

Ochr yn ochr â monitro rheolaidd, mae'r Brifysgol wedi bod yn canolbwyntio ar wella profiad myfyrwyr yn barhaus, gydag ymdrech benodol yn cael ei rhoi ar wella yn y meysydd canlynol sy'n effeithio'n uniongyrchol ar berfformiad myfyrwyr:

Dysgu, Addysgu ac Asesu

Mae'r Brifysgol yn cefnogi ac yn galluogi gwelliant parhaus mewn dysgu ac addysgu, gydag arloesedd a gwelliant parhaus ar draws pob Cyfadran/Ysgol. Ynghyd â chefnogaeth gan Academi Dysgu ac Addysgu Abertawe, mae Arweinwyr Cyfadran/Addysg Ysgol yn cyfarfod yn rheolaidd, ac yn canolbwyntio ar wella dulliau gweithredu yn eu meysydd. Mae'r Brifysgol yn cydnabod ac yn gwobrwyo dysgu ac addysgu drwy lwybrau gyrfaol penodol a thrwy ymgysylltu â'r broses Cymrodoriaeth AU.

Mae hyn wedi arwain at broses newydd o gynllunio camau ac adrodd amdanynt i gefnogi prosesau gwella symlach i alluogi hyblygrwydd ac ymatebolrwydd yn ein dysgu a'n haddysgu, ac ymyriadau wedi'u targedu i gefnogi meysydd penodol ar draws y sefydliad. 

Arweiniodd yr ymyriadau a dargedwyd yn 2023/24 at yr holl feysydd pwnc a nodwyd yn sicrhau sgoriau thematig gwell yn Arolwg Cenedlaethol o Fyfyrwyr 2024, gyda phob pwnc yn gweld gwelliant mewn boddhad cyffredinol.  Roedd canlyniadau allweddol yr ymyriadau yn cynnwys:

• Deall y gall newidiadau bach wneud byd o wahaniaeth i brofiad y myfyriwr yn enwedig o safbwynt cyfathrebu.
• Pwysigrwydd cynnwys Cynrychiolwyr Myfyrwyr gydol y rhaglen ac adeiladu ymdeimlad o gymuned gyda myfyrwyr.
• Pwysigrwydd ennyn diddordeb staff a'u bod yn gweithio fel tîm i wella profiad y myfyrwyr a sicrhau cydraddoldeb profiad ar draws y rhaglen.
• Pwysigrwydd dulliau cyson o ymdrin â phrosesau gwybodaeth ac adborth asesu ar draws rhaglen neu feysydd pwnc gan ddefnyddio offer megis ffurflenni marcio.