Gweithdrefn Camymddwyn Academaidd

Gall myfyrwyr ofyn am addasiadau rhesymol i'r gweithdrefnau yn unol â’r Ddeddf Cydraddoldeb. Bydd ceisiadau’n cael eu hystyried fesul un a’u cadarnhau i’r myfyriwr yn ysgrifenedig.

Mae uniondeb academaidd yn adlewyrchu cyfres gyffredin o egwyddorion sy'n cynnwys gonestrwydd, ymddiriedaeth, diwydrwydd, tegwch a pharch, ac mae'n ymwneud â diogelu uniondeb gwaith a dyfarniad myfyriwr. Mae uniondeb academaidd wedi'i seilio ar yr ethos bod y modd yr ydych chi'n dysgu'r un mor bwysig â'r hyn a ddysgir.

Mae uniondeb academaidd wedi'i seilio ar nifer o egwyddorion craidd. I fyfyrwyr, mae hyn yn golygu:

• Derbyn cyfrifoldeb am eu gwaith a'u hastudiaethau eu hunain;
• Parchu barn pobl eraill, hyd yn oed wrth anghytuno â nhw;
• Parchu hawliau pobl eraill i weithio ac astudio o fewn y 'gymuned ddysgu';
• Cydnabod gwaith pobl eraill, lle mae wedi cyfrannu i'w hastudiaethau, eu hymchwil, neu eu cyhoeddiadau eu hunain;
• Sicrhau bod cyfraniad yr unigolyn i waith grŵp yn cael ei gydnabod yn onest;
• Cefnogi eraill i ymddwyn ag uniondeb academaidd;
• Glynu wrth y gofynion moesegol a, lle bo'n berthnasol, y safonau proffesiynol, sy'n berthnasol i'r ddisgyblaeth;
• Osgoi gweithredu mewn modd fyddai'n ennill mantais annheg;
• Sicrhau bod canlyniadau ymchwil neu ddata arbrofol yn cael eu cynrychioli mewn modd gonest;
• Cydymffurfio â'r gofynion asesu.

Uniondeb academaidd yw'r egwyddor arweiniol ar gyfer yr holl asesiadau myfyrwyr; boed mewn arholiadau neu brofion yn y dosbarth, cyflwyniadau llafar, neu o ran aseiniadau ysgrifenedig, traethodau hir neu draethodau ymchwil i'w hasesu.

Mae camymddygiad academaidd yn cynnwys: llên-ladrad, cyflwyno gwaith wedi'i gynhyrchu gan systemau deallusrwydd artiffisial heb gydnabod hynny, cydgynllwynio, torri rheoliadau arholi, ffugio data, personadu eraill a chomisiynu gwaith i'w asesu (nid yw’r rhestr hon yn gynhwysfawr).

Camymddygiad academaidd yw unrhyw weithred lle mae unigolyn yn ceisio mantais nad oes ganddo hawl iddi, naill ai iddo ef ei hun neu i rywun arall. Bydd hyn yn berthnasol ni waeth a yw ymgeisydd yn gweithredu ar ei ben ei hun neu gydag un neu fwy o unigolion eraill. Tybir bod gweithred neu weithredoedd yn cydweddu â’r diffiniad hwn p’un a ydynt yn digwydd yn ystod, neu mewn perthynas ag, arholiad ffurfiol, gwaith cwrs neu unrhyw fath arall o asesiad mae ymgeisydd yn ymgymryd ag ef i ennill cymhwyster academaidd neu broffesiynol ym Mhrifysgol Abertawe.

Mae gan y Brifysgol amrediad o weithdrefnau a dulliau ar gyfer canfod camymddygiad academaidd:

• Mewn arholiadau (gweler 2.0);
• Mewn asesiadau eraill (gweler 3.0);
• Mewn graddau ymchwil (gweler 6.0);
• Ar ôl dyfarnu Cymhwyster (gweler 8.0).

Gall y Brifysgol ddefnyddio ffyrdd priodol o ganfod ac ymchwilio i achosion o gamymddygiad academaidd, er enghraifft drwy feddalwedd canfod llên-ladrad neu drwy arholiad llafar uniondeb academaidd (gweler 3.1). Gall Cyfadrannau /Ysgolion/Sefydliadau Partner Cydweithredol hefyd ddewis defnyddio system o arholiadau llafar ar hap mewn meysydd pwnc. Caiff uniondeb academaidd yn y Brifysgol ei hyrwyddo a'i gynnal gan Arweinydd Uniondeb Academaidd y Brifysgol, Prif Swyddogion Uniondeb Academaidd a Swyddogion Uniondeb Academaidd Ysgolion/Cyfadrannau.

Wrth ymchwilio i honiadau o gamymddygiad academaidd, mae Arweinydd Uniondeb Academaidd y Brifysgol, ar ran y Brifysgol, yn cadw'r hawl i ymgynghori â phrifysgolion a sefydliadau eraill pan fo'n briodol, ac i rannu gwybodaeth berthnasol. Heb ragfarn i gyffredinolrwydd y materion uchod, dangosir enghreifftiau o gamymddygiad academaidd yn adrannau 2.0 - 2.4, a 3.0 isod.

Fel arfer, bydd y Brifysgol yn cwblhau'r ymchwiliad cychwynnol, camau ffurfiol y broses ac yn penderfynu ar yr achos o fewn 90 niwrnod calendr ar ôl i'r honiad gael ei wneud i'r myfyriwr. Pan fydd oedi, dylid hysbysu'r myfyriwr am gynnydd yr ymchwiliad, gan gynnwys y rhesymau dros oedi, a chynnig amserlen arfaethedig ar gyfer dod i gasgliad am yr achos.

Os oes ymchwiliad i gamymddygiad academaidd wrthi’n cael ei gynnal, ni fyddai'r gwaith sy'n destun yr ymchwiliad fel arfer yn cael ei farcio neu ni fyddai'r marc yn y modiwl dan sylw’n cael ei ryddhau i'r myfyriwr nes bod yr achos wedi dod i ben a, lle bo'r achos yn cael ei brofi, nes bod y gosb wedi'i rhoi.

Mae camymddygiad academaidd yn ystod arholiadau/asesiadau neu brofion dosbarth yn gallu cynnwys y gweithgareddau gwaharddedig canlynol (er nad yw'n gyfyngedig i'r rhain):

• Bod â deunydd nas awdurdodwyd mewn arholiad/asesiad wedi'i fonitro ar-lein/prawf yn y dosbarth, er enghraifft llyfr, llawysgrif, data neu bapurau rhydd, gwybodaeth a geir trwy ddyfais electronig, neu ffynhonnell arall o wybodaeth waharddedig;
• Copïo gan rywun arall neu gyfathrebu â rhywun arall yn yr arholiad, ac eithrio pan awdurdodir hynny ymlaen llaw gan y Gyfadran/yr Ysgol/y Sefydliad Partner;
• Cyfathrebu'n electronig â rhywun arall nas awdurdodwyd;
• Bod â dyfais electronig nas awdurdodwyd sy'n gallu cyfathrebu â dyfeisiadau eraill neu bobl eraill;
• Esgus bod yn ymgeisydd mewn arholiad, neu ganiatáu i rywun arall wneud yr un peth ar eich rhan chi;
• Cyflwyno tystiolaeth o amgylchiadau arbennig i fyrddau arholi sy'n anwir neu wedi'i ffugio, neu sy'n camarwain byrddau arholi neu a allai eu camarwain mewn unrhyw ffordd;
• Cyflwyno papur arholiad fel pe bai'n eiddo i chi os bydd yn cynnwys deunydd a gynhyrchwyd drwy ddulliau gwaharddedig.

2.1 Camymddygiad Academaidd yn ystod arholiadau wyneb yn wyneb

Bydd goruchwyliwr sy’n tybio, neu’n amau, bod ymgeisydd yn cyflawni camymddygiad academaidd yn rhoi gwybod i’r ymgeisydd, yn ddelfrydol ym mhresenoldeb tyst, y bydd yn llunio adroddiad am yr amgylchiadau. Serch hynny, bydd gan yr ymgeisydd hawl i barhau â’r arholiad ac unrhyw arholiadau eraill sy’n dilyn heb ragfarn i unrhyw benderfyniad y gellir ei wneud. Fodd bynnag, ni fydd methu hysbysu'r ymgeisydd na fydd yr amgylchiadau yn cael eu hadrodd yn amharu ar achosion dilynol.

Yn achos goruchwyliwr sy’n cael ei benodi gan Swyddfa Arholiadau Ganolog y Brifysgol ac mae’r arholiad yn cael ei reoli gan Swyddfa Arholiadau Ganolog y Brifysgol, bydd y goruchwyliwr yn rhoi gwybod am yr amgylchiadau cyn gynted â phosib, ar lafar yn y lle cyntaf ac yn ysgrifenedig wedi hynny, i’r Swyddog Arholiadau Canolog a fydd, yn ei dro, yn rhoi gwybod i Swyddog Uniondeb Academaidd y Gyfadran/yr Ysgol ac Arweinydd Uniondeb Academaidd y Brifysgol.

Mewn achos pan fo myfyriwr wedi ysgrifennu arno ei hun, gall y goruchwyliwr gysylltu â’r Swyddfa Arholiadau Ganolog y Brifysgol a gofyn bod aelod o staff o’r Ysgol/y Gyfadran yn mynychu’r arholiad ac yn cadarnhau a yw’r ysgrifen yn berthnasol i’r pwnc/arholiad. Pan fo modd, gellir tynnu llun o’r dystiolaeth hefyd.

Mewn achosion sy'n ymwneud ag arholiad a gaiff ei oruchwylio a'i reoli gan yr Ysgol/y Gyfadran/y Sefydliad Partner, bydd yr oruchwyliwr yn rhoi gwybod am yr achos cyn gynted â phosib, yn ysgrifenedig, i Swyddog Uniondeb Academaidd y Gyfadran/yr Ysgol/y Sefydliad Partner.

2.2 Camymddygiad Academaidd mewn arholiadau/asesiadau proctor ar-lein

Mewn achosion pan ddefnyddir meddalwedd goruchwylio ar-lein i oruchwylio arholiad, bydd y Gyfadran/yr Ysgol/Sefydliad Partner yn adolygu recordiadau'r arholiad pan fydd angen. Pan fydd y Gyfadran/yr Ysgol/Sefydliad Partner yn amau y cafwyd camymddygiad academaidd, bydd yr aelod staff dan sylw'n rhoi gwybod am yr amgylchiadau cyn gynted â phosib i Swyddog Uniondeb Academaidd y Gyfadran/yr Ysgol/Sefydliad Partner.

2.3 Camymddygiad academaidd mewn profion a oruchwylir yn y dosbarth

Yn achos prawf ysgrifenedig nas gwelwyd ymlaen llaw, sy’n cyfrannu at ganlyniad terfynol y modiwl, ac a gynhelir yn y Gyfadran/yr Ysgol/Sefydliad Partner, dylai’r goruchwyliwr roi gwybod i Swyddog Uniondeb Academaidd y Gyfadran/yr Ysgol/Sefydliad Partner yn y lle cyntaf.

2.4 Dyfeisiau electronig anawdurdodedig mewn arholiadau wedi'u harolygu a phrofion yn y dosbarth, ac asesiadau wedi'u goruchwylio ar-lein

Yn achos myfyriwr y ceir fod ganddo ddyfais electronig yn ei feddiant sy'n gallu storio neu ddangos data, gan gynnwys ffôn symudol, wats clyfar neu unrhyw dechnoleg symudol arall na chaniateir yng nghyfarwyddyd yr arholiad/asesiad ac sydd heb ei defnyddio neu le nad oes dim tystiolaeth ei fod wedi'i defnyddio, tybir nad yw'r tramgwydd ond yn dramgwydd yn erbyn rheoliadau'r arholiad/asesiad. 

Bydd y goruchwyliwr yn ysgrifennu cyn gynted â phosib at Swyddog Uniondeb Academaidd y Gyfadran/yr Ysgol/y Sefydliad Partner i dynnu'r achos at ei sylw.

Gall y Swyddog Uniondeb Academaidd gyfweld â'r myfyriwr, gan dynnu ei sylw at y rheoliadau arholi. Yna, bydd y Swyddog Uniondeb Academaidd yn penderfynu a ddylid rhoi cosb ai peidio (gweler isod).

Cosbau:

Er mwyn sicrhau cysondeb wrth roi cosbau, mae'r Brifysgol yn darparu arweiniad ar gosbau yn y Côd Ymarfer ar Gamymddygiad Academaidd.

Y gosb ar gyfer achos cyntaf o dorri’r rheoliadau fydd:

• rhoi rhybudd ysgrifenedig i'r ymgeisydd; dylid cadw cofnod o'r rhybudd.

Os oes ail enghraifft neu achos dilynol o dorri'r rheoliadau, gall y Swyddog Uniondeb Academaidd benderfynu peidio â rhoi rhybudd ysgrifenedig arall ac ymdrin â'r achos yn unol â'r weithdrefn camymddygiad academaidd (gweler 4.0) 

Os amheuir bod y ddyfais electronig wedi cael ei defnyddio, neu os oes tystiolaeth o hyn, (e.e. bu goruchwyliwr yn dyst i hyn), cyfeirir achosion o’r fath at sylw Swyddog Uniondeb Academaidd yr Ysgol/y Gyfadran/y Sefydliad Partner a fydd yn penderfynu a ddangoswyd achos prima facie o gamymddygiad academaidd.

2.5 Camymddygiad academaidd a amheuir a ganfuwyd yn ystod y cyfnod marcio neu wedi hynny (achosion mewn arholiadau wedi'u goruchwylio a phrofion yn y dosbarth, ac asesiadau wedi'u goruchwylio ar-lein)

Os yw arholwr mewnol neu allanol, naill ai yn ystod y cyfnod marcio neu wedi hynny, o’r farn neu’n amau bod ymgeisydd wedi cyflawni camymddygiad academaidd, bydd yn rhoi gwybod am y mater yn ysgrifenedig i Swyddog Uniondeb Academaidd y Gyfadran/yr Ysgol/y Sefydliad Partner cyn gynted â phosib. 

Bydd y Swyddog Uniondeb Academaidd yn penderfynu a ddangoswyd achos prima facie o gamymddygiad academaidd (gweler 4.2).

Pan fo honiad yn ymwneud ag achos ar y cyd sy'n cynnwys myfyriwr o'r Coleg, Prifysgol Abertawe, ar raglen sydd naill ai wedi’i hintegreiddio neu heb ei hintegreiddio ynghyd â myfyriwr o Brifysgol Abertawe (er enghraifft, cyfathrebu mewn arholiad), bydd Swyddog Uniondeb Academaidd yr Ysgol/y Gyfadran yn ymdrin â'r achos ac yn penderfynu, gan ystyried yr holl amgylchiadau, a oes  achos prima facie. Os yw achosion yn ymwneud â myfyrwyr o’r Coleg, Prifysgol Abertawe, ar raglenni nad ydynt wedi'u hintegreiddio yn unig, bydd Y Coleg, Prifysgol Abertawe, yn ymdrin â'r rhain.

2.6 Camau gweithredu pellach i'w cymryd: Arholiad Ysgol/Cyfadran/Sefydliad Partner

Wedi derbyn adroddiad sy'n ymwneud â honiad o gamymddygiad academaidd, bydd y Swyddog Uniondeb Academaidd yn penderfynu, gan ystyried yr holl amgylchiadau, a oes achos prima facie o gamymddygiad academaidd. 

Gall y Swyddog Uniondeb Academaidd ymdrin â'r honiad yn unol â 2.4 uchod, os yw o’r farn bod y rheoliadau arholi wedi'u torri.

Os penderfynir peidio â chymryd camau pellach yn erbyn yr ymgeisydd, hysbysir yr ymgeisydd yn ysgrifenedig bod y mater wedi'i gau.

Os yw'n fodlon bod achos prima facie o gamymddygiad academaidd i'w ateb, bydd Swyddog Uniondeb Academaidd yr Ysgol/y Gyfadran/y Sefydliad Partner yn prosesu'r achos yn unol â phwynt 4.0

Caiff llên-ladrad ei ddiffinio fel defnyddio gwaith rhywun arall person heb gydnabyddiaeth a'i gyflwyno i'w asesu fel eich gwaith eich hun; er enghraifft trwy gopïo neu aralleirio heb gydnabod y ffynhonnell. Llên-ladrad yw hwn, boed yn fwriadol neu’n anfwriadol.

Dyma rai enghreifftiau:

• Defnyddio dyfyniad(au) o waith cyhoeddedig neu waith nas cyhoeddwyd gan unigolyn arall heb nodi'n glir ei fod yn ddyfyniad drwy ei roi mewn dyfynodau a’i gydnabod drwy ddull cyfeirnodi priodol;
• Crynhoi syniadau, barn, ffigurau, meddalwedd neu ddiagramau person arall heb gyfeirio at y person hwnnw yn y testun ac at y ffynhonnell yn y llyfryddiaeth mewn modd priodol;
• Defnyddio deunydd wedi ei lawrlwytho o’r rhyngrwyd heb ei gydnabod;
• Cyflwyno gwaith myfyriwr arall fel ei waith ei hun.

Nid yw'r rhestr enghreifftiau'n gynhwysfawr.

Ni chydnabyddir hunan-lên-ladrad yn rheoliadau Prifysgol Abertawe. Os bydd myfyriwr wedi cyflawni hunan-lên-ladrad, bydd y Gyfadran/yr Ysgol/Sefydliad Partner yn marcio'r gwaith yn unol â'r meini prawf arferol ar gyfer marcio.

Nid yw rheoliadau Prifysgol Abertawe'n gwahardd defnyddio deallusrwydd artiffisial cynhyrchiol i lunio gwaith gwreiddiol yn benodol, ond rhaid i unrhyw ddefnydd gydymffurfio â'r canllawiau a roddir ar gyfer pob aseiniad a rhaid ei gydnabod a'i gyfeirnodi'n glir.

Os ydych yn defnyddio deunydd wedi'i greu gan ddeallusrwydd artiffisial, heb gydnabod hynny'n briodol, ac yn ei gyflwyno i'w asesu fel eich gwaith eich hun, gellir ystyried hynny'n dramgwydd camymddygiad academaidd. Felly, cynghorir myfyrwyr i fod yn ofalus iawn wrth ddefnyddio offer o'r fath, er mwyn sicrhau uniondeb academaidd a safon eu gwaith. Dyma rai enghreifftiau y gellir eu hystyried yn gamymddygiad academaidd:

• Creu ymateb i aseiniad gan ddefnyddio ChatGPT neu adnodd tebyg a chyflwyno'r gwaith cyfan, neu'n rhannol, â mân ddiwygiadau yn unig
• Copïo darnau o destun wedi'i greu gan ddeallusrwydd artiffisial a'u cynnwys mewn aseiniad heb gydnabyddiaeth neu gyfeirnodi priodol i ddangos tarddiad y testun.
• Defnyddio deallusrwydd artiffisial cynhyrchiol i greu data, graffiau, delweddau, sain neu fideo neu unrhyw fath arall o gynnwys heb gydnabyddiaeth briodol

Nid yw'r rhestr hon o enghreifftiau'n gynhwysfawr.

Gellir ystyried mân ddefnydd o ddeallusrwydd artiffisial cynhyrchiol heb gydnabyddiaeth yn arfer academaidd gwael (gweler 3.6). Yn ogystal, os ymddengys fod testun neu gynnwys heb ei gydnabod wedi'i greu gan ddeallusrwydd artiffisial, ond ystyrir nad yw hyn yn sylweddol nac o bwys mawr, gall y broses farcio adlewyrchu hyn gan arwain at ddyfarnu gradd is yn hytrach na thrin yr achos fel tramgwydd camymddygiad academaidd.

Mae Polisi Prawf-ddarllen y Brifysgol yn cynnwys canllawiau wedi'u diweddaru ynghylch defnyddio offer a meddalwedd deallusrwydd artiffisial a ddyluniwyd ar gyfer golygu, aralleirio a chyfieithu testun. Dylai myfyrwyr fod yn ymwybodol o'r hyn a ganiateir o ran defnyddio'r rheini wrth geisio datblygu a gwella eu gwaith.

Cydgynllwynio yw dau neu fwy o bobl sy'n creu gwaith ar y cyd ac yn ei gyflwyno fel gwaith unigolyn.

Mae enghreifftiau'n cynnwys:

• Dau neu fwy o fyfyrwyr yn cydweithio i ddatblygu data neu ddeunydd arall heb ganiatâd ymlaen llaw. Wedyn, byddai'r gwaith yn cael ei gyflwyno i'w asesu heb gydnabod awdur neu awduron y gwaith;
• Rhannu data, deunydd neu waith cwrs â myfyriwr arall ac wedyn ei gyflwyno i'w asesu heb wybod i'r awdur neu awduron, neu heb eu cydsyniad.

Comisiynu gwaith yw'r weithred o dalu am, neu drefnu, i rywun (neu system) arall lunio darn o waith, p'un a yw hyn wedyn yn cael ei gyflwyno i'w asesu fel gwaith y myfyriwr ei hun ai peidio.

Dyma rai enghreifftiau:

• Comisiynu traethawd sydd i'w ysgrifennu gan unigolyn neu system arall;
• Cyrchu neu lawrlwytho deunydd o wefannau cyfnewid traethodau;
• Talu rhywun arall i gasglu, trin neu ddehongli data, lle mae hyn yn ofyniad fel rhan o astudiaethau'r myfyriwr.

Nid yw’r rhestr hon yn un gynhwysfawr. Mae ffugio canlyniadau gwaith labordy, gwaith maes, neu unrhyw waith arall sy'n casglu ac yn dadansoddi data yn gamymddygiad academaidd hefyd.

3.1 Arholiadau Llafar Uniondeb Academaidd fel ffordd o ddarganfod camymddygiad academaidd heb fod mewn arholiad ar lefel y Gyfadran/yr Ysgol/Sefydliad Partner

3.1.1

Os oes gan Swyddog Uniondeb Academaidd yr Ysgol/y Gyfadran/y Sefydliad Partner bryderon ynghylch a yw darn o waith a gyflwynwyd gan fyfyriwr yn waith y myfyriwr ei hun, gall Swyddog Uniondeb Academaidd yr Ysgol/y Gyfadran/y Sefydliad Partner benderfynu y dylid gwahodd y myfyriwr i gael arholiad llafar academaidd. Diben yr arholiad llafar uniondeb academaidd yw profi gwybodaeth y myfyriwr o'r gwaith y mae wedi'i gyflwyno a rhoi cyfle i'r myfyriwr ddangos mai ei waith ef ei hun yw'r gwaith, cyn y cymerir unrhyw gamau camymddygiad academaidd.

3.1.2

Dylid rhoi o leiaf ddau ddiwrnod o rybudd i'r myfyriwr yn ysgrifenedig am yr arholiad llafar uniondeb academaidd. Rhaid defnyddio templed safonol a fydd ar gael gan y Gwasanaethau Addysg. Gall myfyriwr ddod â ffrind neu gynrychiolydd gan Ganolfan Gyngor Undeb y Myfyrwyr (bydd manylion cyswllt y Ganolfan Gyngor wedi'u cynnwys yn y llythyr). Fodd bynnag, ni chaniateir i unigolyn/unigolion sy'n dod gyda'r myfyriwr ymateb i unrhyw gwestiwn ar ran y myfyriwr. Cynghorir i'r myfyriwr ddod â thystiolaeth o waith paratoi sy'n berthnasol i'r gwaith a gyflwynwyd, megis drafftiau, ffynonellau ac adborth. Os yw'r myfyriwr wedi derbyn unrhyw gymorth gan drydydd parti yn ei waith (e.e. prawf-ddarllenydd), cynghorir iddo ddod â'r copi gwreiddiol, heb ei ddiwygio, i gynorthwyo'r panel cyfweld wrth asesu i ba raddau mae'r newidiadau a wnaed wedi effeithio ar ansawdd y gwaith.

Fel arfer, caiff yr arholiad llafar ei gynnal yn electronig drwy Zoom/Fideo-gynadledda, a bydd disgwyl i'r holl bartïon droi eu gwe-gamerau ymlaen.

3.1.3

Bydd y broses arholiad llafar fel arfer yn cynnwys Panel sy'n cynnwys o leiaf dau aelod o staff academaidd, fel arfer Cadeirydd ac Arbenigwr Pwnc (fel arfer, arweinydd y modiwl neu farciwr y modiwl). Ni ddylai'r panel gynnwys unrhyw Swyddogion Uniondeb Academaidd o Gyfadrannau/Ysgolion/Sefydliad Partner sydd wedi, neu a fydd, yn rhan o'r achos penodol. Rhaid cadw cofnod o'r arholiad llafar; gallai hyn fod ar ffurf cofnodion ysgrifenedig a/neu recordiad clywedol/cyfryngol.Yn ôl disgresiwn y Gyfadran/yr Ysgol/Sefydliad Partner, gellir enwebu trydydd aelod o staff er mwyn cofnodi/trawsgrifio'r arholiad llafar.

3.1.4

Cylch gorchwyl Panel yr Arholiad Llafar fydd:

• Profi dealltwriaeth y myfyriwr o'r gwaith a gyflwynwyd gandd;
• Rhoi cyfle i'r myfyriwr ddangos mai ei waith ef yw'r gwaith cyn cynnal camau camymddygiad academaidd.

3.1.5

Bydd y weithdrefn yn ystod yr arholiad llafar fel a ganlyn:

• Bydd y Cadeirydd yn gofyn i bob cyfranogwr gyflwyno ei hun;
• Bydd y Cadeirydd yn hysbysu'r holl gyfranogwyr o gylch gorchwyl y Panel;
• Gall y panel ofyn cwestiynau sy'n ymwneud â'r gwaith megis: sut aeth y myfyriwr at y gwaith; pa ymchwil a wnaed; pa ffynonellau a ddefnyddiwyd a sut y dewiswyd y rhain; beth yw prif gysyniadau'r gwaith, a sut y lluniwyd syniadau/dadleuon/data. Efallai y gofynnir i'r myfyriwr hefyd egluro datganiadau, damcaniaethau neu dermau penodol a ddefnyddir yn eu gwaith, ac a gafodd unrhyw gymorth neu gefnogaeth gan unrhyw drydydd parti.

3.1.6

Dylid rhoi'r cyfle i'r myfyriwr ddangos mai ei waith ef yw'r gwaith, gan gynnwys rhoi'r cyfle iddo gyflwyno unrhyw dystiolaeth sydd ganddo, megis drafftiau, ffynonellau etc.

3.1.7

Os nad yw myfyriwr yn dod i'r arholiad llafar uniondeb academaidd heb reswm digonol, gall Swyddog Uniondeb Academaidd y Gyfadran/yr Ysgol/Sefydliad Partner a/neu'r Pwyllgor Ymchwilio Camymddygiad Academaidd ddod i gasgliad o ran methiant y myfyriwr i fynychu. Neu, os penderfynir bod angen arholiad llafar er mwyn rhoi dyfarniad teg i achos, ac nid yw'r myfyriwr yn dod i'r arholiad nac yn ymateb i wahoddiad(au), gellir cadw marciau'r myfyriwr yn y modiwl dan sylw yn ôl nes ei fod yn cydweithredu â'r broses camymddygiad academaidd. Gall y bwrdd arholi gadw penderfyniad ar ddilyniant/canlyniad dyfarniad y myfyriwr yn ôl hefyd.

3.1.8

Yn dilyn yr arholiad llafar uniondeb academaidd, bydd y Cadeirydd yn paratoi adroddiad yn nodi ei farn o ran gwybodaeth y myfyriwr am y gwaith a gyflwynwyd ganddo a'r rhesymau dros ei farn.

3.1.9

Os bydd y Panel, ar sail barn academaidd y staff perthnasol, yn penderfynu nad yw'r myfyriwr wedi dangos mai ei waith ef yw'r asesiad, bydd y Cadeirydd yn darparu copi o'i adroddiad a recordiad/trawsgrifiad yr arholiad llafar i Swyddog Uniondeb Academaidd y Gyfadran/yr Ysgol/Sefydliad Partner neu Arweinydd Uniondeb Academaidd y Brifysgol (fel y bo'n briodol), yn ogystal â'r gwaith papur ategol arferol parthed yr achos. Fel arfer, dylid gwneud hyn o fewn pum niwrnod gwaith i ddyddiad arholiad llafar uniondeb academaidd y myfyriwr (yn unol â 3.4 isod).

Os yw'r Panel yn penderfynu, ar sail barn academaidd y staff perthnasol, fod y myfyriwr wedi dangos mai ei waith ef yw'r gwaith a aseswyd, bydd y Cadeirydd yn hysbysu Arweinydd/Marciwr y Modiwl y dylid marcio'r gwaith yn unol â meini prawf asesu arferol y modiwl. Dylid hysbysu'r myfyriwr yn ysgrifenedig ac nid oes angen gweithredu ymhellach.

3.2 Ymchwilio i gamymddygiad academaidd

Bydd pob Ysgol/Cyfadran/Sefydliad Partner yn penodi o leiaf ddau Swyddog Uniondeb Academaidd a Phrif Swyddog Uniondeb Academaidd y Gyfadran i ymdrin ag achosion o gamymddygiad academaidd. 

Ym mhob achos, bydd un Swyddog Uniondeb Academaidd yn ymgymryd â'r ymchwiliad gan wneud argymhelliad ar yr achos (gweler isod). Bydd ail Swyddog Uniondeb Academaidd yn gyfrifol am benderfynu a gyflawnwyd tramgwydd ac os felly, am roi cosb.  Yr Ysgol/y Gyfadran/y Sefydliad Partner fydd yn gyfrifol am ddyrannu cyfrifoldebau; fodd bynnag, cyfrifoldeb Swyddogion Uniondeb Academaidd yr Ysgol/y Gyfadran/y Sefydliad Partner yw sicrhau bod yr holl staff yn ymwybodol o'r weithdrefn.

Ym mhob achos lle amheuir camymddygiad academaidd, disgwylir i Ysgolion/Cyfadrannau/Sefydliadau Partner ymgymryd â'r camau a restrir yn adran 4.0. Bydd baich y profi (sef y ddyletswydd i brofi’r honiad) ar yr Ysgol/y Gyfadran/y Sefydliad Partner, a dylai safon y prawf fod yn seiliedig ar bwysau tebygolrwydd: caiff ffaith ei chadarnhau os yw’n fwy tebygol ei bod wedi digwydd na pheidio. Dylid ymdrin ag achosion sy'n ymwneud â thraethodau ymchwil graddau ymchwil yn unol â'r cyfarwyddyd yn adran 6.0.

4.1 Cam Un - adroddiad i Brif Swyddog Uniondeb Academaidd y Gyfadran/yr Ysgol/y Sefydliad Partner

Os bydd aelod o staff o’r farn  y bu camymddygiad academaidd mewn perthynas ag unrhyw waith a gwblhawyd dan amodau arholiad/amodau heblaw am arholiad, neu os yw’n amau hynny, dylai roi gwybod am y mater drwy’r system briodol a darparu tystiolaeth berthnasol i Brif Swyddog Uniondeb Academaidd y Gyfadran/yr Ysgol/y Sefydliad Partner, fel arfer o fewn pum niwrnod gwaith ar ôl iddo ystyried gwaith y myfyriwr neu ar ôl arholiad llafar uniondeb academaidd y myfyriwr. Fel arfer ni fyddai'r gwaith dan sylw yn cael ei farcio ac ni fyddai canlyniad y modiwl fel arfer yn cael ei roi i'r myfyriwr nes y penderfynir ar yr achos o gamymddygiad academaidd.

Gall yr aelod staff (neu ei gydweithiwr) ei gwneud hi’n ofynnol i'r myfyriwr gael arholiad llafar uniondeb academaidd i brofi gwybodaeth y myfyriwr am y gwaith a gyflwynwyd cyn rhoi gwybod am y mater i Brif Swyddog Uniondeb Academaidd yr Ysgol/y Gyfadran/y Sefydliad Partner, yn unol â 3.1 uchod.

4.2 Cam 2 - dangos achos prima facie       

Yn gyntaf oll, bydd Prif Swyddog Uniondeb Academaidd y Gyfadran/yr Ysgol/y Sefydliad Partner, neu ei enwebai, yn penderfynu a oes achos prima facie o gamymddygiad academaidd, gan ystyried y dogfennau/y dystiolaeth a phan fo angen, drwy drafod â'r myfyriwr.

Gall y Prif Swyddog Uniondeb Academaidd ofyn i aelod o’r staff academaidd gynnal arholiad llafar uniondeb academaidd i brofi gwybodaeth y myfyriwr am y gwaith a gyflwynwyd, yn unol â 3.1 uchod.

Gall Ysgolion/Cyfadrannau/Sefydliadau Partner hefyd archwilio unrhyw waith arall a gyflwynwyd gan y myfyriwr o'r blaen (gan gynnwys gwaith a gyflwynwyd mewn Ysgolion/meysydd pwnc eraill lle mae'r myfyriwr wedi astudio modiwlau) i wirio am enghreifftiau posib eraill o gamymddygiad academaidd.

Bydd y Gyfadran/yr Ysgol yn ymdrin ag achosion sy'n ymwneud â myfyrwyr o’r Coleg, Prifysgol Abertawe, ar raglenni sydd wedi’u hintegreiddio yn unol â rheoliadau a nodir yn adran 7.0. 

Mewn achosion sy'n ymwneud â neb arall ond myfyriwr (myfyrwyr) o’r Coleg/Prifysgol Abertawe ar raglen nad yw wedi’i hintegreiddio, dylid cyfeirio'r achos at Y Coleg, Prifysgol Abertawe.

Fel arfer, ni fydd y Prif Swyddog Uniondeb Academaidd yn cael ei hysbysu am unrhyw honiadau a gadarnhawyd o'r blaen o gamymddygiad academaidd cyn gwneud ei argymhelliad ar yr honiad dan sylw. Fodd bynnag, dylid rhannu’r wybodaeth hon â’r Ail Swyddog Uniondeb Academaidd cyn penderfynu ar y gosb mewn achosion priodol.

Os nad oes achos prima facie o gamymddygiad academaidd, dylid rhoi gwybod i'r myfyriwr ac ni chymerir camau ffurfiol pellach.

4.3 Ymarfer academaidd gwael

Mewn achosion lle mae myfyriwr yng nghamau cynnar ei yrfa academaidd (Lefel 3/4 neu'r bloc addysgu cyntaf ar raglen ar gyfer myfyrwyr mynediad uniongyrchol Lefel 5 a myfyrwyr ôl-raddedig a addysgir Lefel 7) a cheir mân achosion o dorri’r rheoliadau, gall y Swyddog Uniondeb Academaidd benderfynu bod myfyriwr wedi camddeall y gofynion cyfeirnodi ac arfer academaidd gwael, yn hytrach na chyflawni camymddygiad academaidd. 

Byddai achosion nodweddiadol yn cynnwys mân achosion a/neu achosion cymharol ddibwys o:

• Gyfeirnodi gwael
• Cydnabyddiaeth anghywir (neu ddiffyg cydnabyddiaeth) am waith a gopïwyd ac a ychwanegwyd at aseiniad
• Swm bach o waith a gopïwyd gan fyfyriwr arall neu a gynhyrchwyd gan systemau deallusrwydd cynhyrchio
• Darnau byr o aralleirio heb gydnabyddiaeth briodol

Mewn achosion o'r fath, rhoddir rhybudd anffurfiol i'r myfyriwr a chaiff ei gyfeirio at y ffynonellau priodol o gyngor (megis Tiwtor Personol, llyfrgellydd pwnc, cyrsiau hyfforddiant ar-lein a'r Ganolfan Llwyddiant Academaidd) i gael arweiniad ar gyfeirnodi cywir ac arfer academaidd da. Dim ond un rhybudd anffurfiol fydd yn cael ei roi fel arfer. Fodd bynnag, gan gyfeirio at yr uchod, gall y Swyddog Uniondeb Academaidd ddefnyddio ei ddisgresiwn a rhoi rhybudd anffurfiol arall.

Bydd yr Ysgol/y Gyfadran/y Sefydliad Partner yn marcio'r gwaith yn unol â'r meini prawf marcio arferol. Caiff achosion o'r fath eu nodi ond ni chânt eu cofnodi fel camymddygiad academaidd. Bydd unrhyw dramgwyddau diweddarach yn cael eu hystyried dan y gweithdrefnau camymddygiad academaidd.

4.4    Prosesu honiad o gamymddygiad academaidd pan fydd achos prima facie wedi'i ddangos

Dylai Prif Swyddog Uniondeb Academaidd yr Ysgol/y Gyfadran/y Sefydliad Partner benderfynu a ddylid ymdrin â'r achos drwy gyfweliad neu'n ysgrifenedig.

Yn achos honiadau o gomisiynu ac achosion sy'n ymwneud â thraethawd ymchwil ôl-raddedig, mae'n ofynnol i'r Ysgol/y Gyfadran/y Sefydliad Partner gyfweld â’r myfyriwr neu'r myfyrwyr dan sylw.

4.5    Cam Tri – ymateb y myfyriwr i'r honiad

4.5.1 

Os dangoswyd achos prima facie o gamymddygiad academaidd, hysbysir y myfyriwr neu'r myfyrwyr dan sylw'n ysgrifenedig am yr achos honedig o gamymddygiad academaidd. Lle mae myfyriwr wedi cael ei wahodd i gyfweliad ac mae'r myfyriwr wedi nodi nad yw'n dymuno bod yn bresennol, cynhelir y cyfarfod yn ei absenoldeb. Fel arfer, ni fydd myfyriwr yn cael anfon unigolyn arall i'r cyfweliad yn ei absenoldeb oni bai bod Swyddog Uniondeb Academaidd y Gyfadran/yr Ysgol/y Sefydliad Partner yn awdurdodi hyn cyn y cyfweliad. Os na cheir ymateb gan y myfyriwr ar ôl pob ymdrech resymol i gysylltu ag ef, cynhelir yr achos yn ei absenoldeb. Mewn amgylchiadau eithriadol gellir gohirio’r cyfweliad unwaith.

4.5.2

Pan wahoddir y myfyriwr i gyfweliad, bydd ganddo'r hawl i ddod â chyfaill neu gydweithiwr (sy'n aelod o'r Brifysgol) i'r cyfweliad, neu gynrychiolydd o Undeb y Myfyrwyr. Rôl unrhyw unigolyn sy'n dod gyda'r myfyriwr fydd cefnogi'r myfyriwr hwnnw, ac fel arfer, ni chaniateir iddo ateb cwestiynau ar ran y myfyriwr.

Mae gan fyfyrwyr fynediad at wasanaethau cymorth myfyrwyr profiadol ag adnoddau da ac felly fel arfer ni fydd angen iddynt geisio cyngor cyfreithiol na dod â rhywun sy'n gweithredu mewn rhinwedd gyfreithiol gyda nhw i'r cyfarfod.

Fodd bynnag, gall myfyrwyr ofyn i rywun sy'n gweithredu mewn rhinwedd gyfreithiol ddod gyda nhw os ydynt wedi cofrestru ar raglen Addasrwydd i Ymarfer. Mewn achosion o'r fath, dylai'r myfyriwr gyflwyno cais i Gyfarwyddwr y Gwasanaethau Addysg. Mae gan Gyfarwyddwr y Gwasanaethau Addysg y disgresiwn llwyr i dderbyn neu wrthod cais a bydd ei benderfyniad yn derfynol.

Os caniateir i'r myfyriwr ddod â rhywun sy'n gweithio mewn rhinwedd gyfreithiol i'r cyfweliad, bydd natur y cyfweliad yn cael ei hegluro i’r unigolyn hwnnw, h.y. nid proses gyfreithiol ydyw ac ni chaiff ei chynnal felly.

Mae'n bosib hefyd y bydd cyngor cyfreithiol ar gael i Swyddogion Uniondeb Academaidd y Gyfadran, yn gyson â'r cyngor a ganiateir i'r myfyriwr.

4.5.3

Gall myfyriwr hefyd ddod â chyfieithydd ar y pryd i'r cyfweliad os teimlir na fydd yn gallu deall y cyfweliad yn llawn. Cyfrifoldeb y myfyriwr yw trefnu cyfieithydd ar y pryd o'r fath a'r myfyriwr fydd yn talu'r ffïoedd (ac eithrio yn achos cyfieithu Cymraeg gweler isod). Dylai’r myfyriwr roi enw’r cyfieithydd i’r Gyfadran/yr Ysgol/y Sefydliad Partner cyn y cyfweliad. Rôl y cyfieithydd ar y pryd yw cyfieithu'r deialog rhwng y partïon yn unig; ni chaiff ateb cwestiynau ar ran y myfyriwr nac ychwanegu unrhyw sylwadau ei hun.

Os yw myfyrwyr yn dymuno i'r cyfweliad gael ei gynnal yn Gymraeg, dylent roi gwybod i’r Ysgol/y Gyfadran wrth dderbyn dyddiad y cyfweliad, er mwyn i Swyddfa Iaith Gymraeg y Brifysgol drefnu gwasanaeth cyfieithu. Darperir gwasanaethau o'r fath am ddim i'r myfyriwr.

4.5.4

Fel arfer, byddai'r cyfweliad yn cynnwys o leiaf ddau aelod o staff, fel arfer y Prif Swyddog Uniondeb Academaidd ac un arall. Gall yr Ail Swyddog Uniondeb Academaidd neu aelod arall o'r staff academaidd gyflawni’r rôl hon. Os bydd yr Ail Swyddog Uniondeb Academaidd yn bresennol yn y cyfweliad, byddai'r Prif Swyddog Uniondeb Academaidd Cyntaf yn dal i wneud argymhelliad ar yr achos yn dilyn y cyfweliad, a byddai'r Ail Swyddog Uniondeb Academaidd yn gwneud penderfyniad ar sail hyn. Mewn achosion sy'n ymwneud â thraethawd ymchwil ôl-raddedig, mae'n arfer da cynnwys Arweinydd Ymchwil Ôl-raddedig (nad yw wedi ymwneud â'r achos o'r blaen) fel trydydd aelod o'r staff academaidd i gynghori ar brosesau a rheoliadau ymchwil ôl-raddedig. Fodd bynnag, Swyddogion Uniondeb Academaidd yr Ysgol/y Gyfadran/y Sefydliad Partner fydd yn gwneud y penderfyniad terfynol.

4.5.5

Rhaid cadw cofnod o'r cyfarfod; gall hyn fod ar ffurf cofnodion ysgrifenedig a/neu recordiad sain/cyfryngau.Yn ôl disgresiwn yr Ysgol/y Gyfadran/y Sefydliad Partner, gellir enwebu aelod o staff i recordio/drawsgrifio'r cyfarfod.

Caiff cyfarfodydd eu cynnal yn electronig drwy fideo-gynadledda fel arfer, a disgwylir i bawb droi eu gwe-gamerâu ymlaen.

Dylid darparu copïau o'r dystiolaeth i fyfyrwyr.

Yn achos cydgynllwynio, dylid anfon copïau o'r holl waith sy'n destun yr ymchwiliad i'r myfyrwyr, neu rannau o’r gwaith fel y bo'n briodol, ac unrhyw dystiolaeth a gyflwynwyd cyn y cyfweliad gan y myfyriwr arall/myfyrwyr eraill. Nid yw'n ofynnol i dystiolaeth o'r fath fod yn ddienw.

4.5.6

Cylch gorchwyl y cyfweliad fydd:

• Ystyried y dystiolaeth a gyflwynwyd mewn perthynas â'r honiad o gamymddygiad academaidd
• Gwneud argymhelliad ynghylch canlyniad yr achos

Mewn achosion lle mae’r Ail Swyddog Uniondeb Academaidd yn bresennol yn y cyfweliad, bydd y cylch gorchwyl yn cynnwys:

• Ystyried argymhelliad y Prif Swyddog Uniondeb Academaidd
• Penderfynu a brofwyd yr honiad ai peidio
• Penderfynu, mewn achosion priodol, ar y gosb a ddylai gael ei rhoi

4.5.7

Bydd y weithdrefn yn ystod y cyfweliad fel a ganlyn:

Bydd y Prif Swyddog Uniondeb Academaidd yn:

• Cyflwyno ei hun ac unrhyw staff ychwanegol i'r myfyriwr
• Amlinellu diben y Panel a'r canlyniadau posib
• Hysbysu'r myfyriwr am yr honiad a chrynhoi tystiolaeth/ffeithiau'r achos
• Dweud wrth y myfyriwr y bydd yn ei holi, ar y cyd â'r Ail Swyddog Uniondeb Academaidd/aelod staff, yn galw tystion ac yn cyflwyno tystiolaeth fel y gwêl yn briodol
• Rhoi cyfle i'r myfyriwr a/neu ei gynrychiolwyr ymateb i'r honiad ac amlinellu ei achos
• Rhoi cyfle i'r myfyriwr gyflwyno unrhyw dystiolaeth sydd ganddo, er enghraifft drafftiau, ffynonellau, etc.
• Asesu dealltwriaeth y myfyriwr o uniondeb academaidd a chamymddygiad academaidd
• Pan fo'n briodol, gofyn i'r myfyriwr a yw'n dymuno cynnig unrhyw amgylchiadau lliniarol. Dylid atgoffa'r myfyriwr na fydd modd cyfeirio at yr amgylchiadau hynny fel rheswm dros adolygiad yn ddiweddarach, pe gallai fod wedi dwyn yr amgylchiadau hynny at sylw’r Gyfadran/yr Ysgol/y Sefydliad Partner, cyn i’r penderfyniad gael ei wneud
• Darparu gwybodaeth i'r myfyriwr ynghylch y llinell amser ar gyfer ei benderfyniad a'r hawl i apelio yn erbyn y penderfyniad
• Pan fo'n briodol, cyfeirio'r myfyriwr at ffynonellau cymorth a chefnogaeth ychwanegol, er enghraifft, y Tiwtor Personol, y llyfrgellydd pwnc neu'r Rhaglen Llwyddiant Academaidd
• Cadw cofnod o'r cyfarfod

Gellir newid honiad yn ystod cyfweliad/ymchwiliad pan ystyrir bod un o'r tramgwyddau camymddygiad academaidd eraill yn fwy priodol.  

4.5.8  

Ar ôl ystyried y dystiolaeth ac unrhyw ymateb a ddarperir gan y myfyriwr, bydd y Prif Swyddog Uniondeb Academaidd yn cyfeirio'r achos, yr holl dystiolaeth berthnasol, yr ymateb ysgrifenedig a gafwyd gan y myfyriwr a nodiadau o unrhyw gyfarfod a gynhaliwyd gyda'r myfyriwr at sylw’r Ail Swyddog Uniondeb Academaidd ynghyd â'i argymhelliad o ran canlyniad yr achos. Os yw'r Ail Swyddog Uniondeb Academaidd yn bresennol yn y cyfarfod, bydd y Prif Swyddog Uniondeb Academaidd yn gwneud ei argymhelliad i'r Ail Swyddog Uniondeb Academaidd a fydd yn gwneud y penderfyniad terfynol ar y canlyniad. 

4.6  Cam Pedwar - profi'r achos

Bydd Ail Swyddog Uniondeb Academaidd y Gyfadran/yr Ysgol/y Sefydliad Partner yn ystyried yr holl dystiolaeth ac yna bydd yn penderfynu a brofwyd yr honiad o gamymddygiad academaidd ai peidio. Bydd baich y prawf (sef y ddyletswydd i brofi’r honiad) ar y Gyfadran/yr Ysgol/y Sefydliad Partner, a dylai safon y prawf fod yn seiliedig ar bwysau tebygolrwydd: caiff ffaith ei chadarnhau os yw’n fwy tebygol ei bod wedi digwydd na pheidio.

Nid oes rhaid i'r Ail Swyddog Uniondeb Academaidd ystyried bwriad mewn perthynas â honiad o gamymddygiad academaidd - ni ellir amddiffyn achos drwy ddweud bod y tramgwydd wedi’i gyflawni’n anfwriadol neu’n ddamweiniol.  Fodd bynnag, gall y myfyriwr gyflwyno amgylchiadau o’r fath fel amgylchiadau lliniarol mewn perthynas â’r gosb a roddir.

Lle nad yw safon y prawf yn cael ei bodloni, dylid cau'r achos a rhoi gwybod i'r myfyriwr am y penderfyniad hwn yn ysgrifenedig.

Mewn achosion lle teimlir mai arfer academaidd gwael yn hytrach na chamymddygiad academaidd a gyflawnwyd, ymdrinnir â'r achos yn unol â 4.3.

Os bydd yr Ail Swyddog Uniondeb Academaidd yn canfod bod honiad o gamymddygiad academaidd wedi'i brofi, yna bydd yn penderfynu ar y gosb sydd i'w rhoi yn unol â Cham Pump isod.

4.7 Cam Pump – penderfynu ar gosbau

Er mwyn sicrhau cysondeb wrth roi cosbau, mae'r Brifysgol yn darparu arweiniad ar gosbau yn y Côd Ymarfer ar Gamymddygiad Academaidd.

Yn ogystal â'r arweiniad hwn, mewn perthynas â dysgu annibynnol cyfeiriedig gan fyfyrwyr ôl-raddedig a addysgir, traethodau ymchwil ôl-raddedig ac ail dramgwyddau neu dramgwyddau dilynol, bydd Prif Swyddog Uniondeb Academaidd y Gyfadran yn cadarnhau'r gosb arfaethedig. Ni ddylid hysbysu'r myfyriwr am y gosb nes bod yr achos wedi cael ei gadarnhau gan Brif Swyddog Uniondeb Academaidd y Gyfadran.

Dylai’r Ail Swyddog Uniondeb Academaidd gyfeirio at Gôd Ymarfer y Brifysgol ar Gamymddygiad Academaidd a gall ymgynghori â chydweithwyr wrth roi cosb.

Bydd yr ail Swyddog Uniondeb Academaidd hefyd yn ystyried y canlynol:

• Difrifoldeb y tramgwydd
• Goblygiadau'r gosb ar gyfer y myfyriwr
• Hanes yr achos
• Cofnod academaidd y myfyriwr (gan gynnwys unrhyw dramgwyddau blaenorol a brofwyd)
• Bwriad
• Unrhyw amgylchiadau lliniarol sy'n cael eu dwyn i'w sylw wrth benderfynu ar y gosb

Dylai’r Ail Swyddog Uniondeb Academaidd fod yn argyhoeddedig bod gan unrhyw amgylchiadau lliniarol gysylltiad uniongyrchol â’r achos ac, yn benodol, eu bod wedi dylanwadu ar weithredoedd y myfyriwr neu’r myfyrwyr dan sylw. Rhaid i ymgeiswyr sy'n cyflwyno amgylchiadau lliniarol ddarparu tystiolaeth i ategu’r amgylchiadau a darparu eglurdeb ar eu heffeithiau. Lle gallai ymgeisydd fod wedi hysbysu'r Gyfadran/yr Ysgol/y Sefydliad Partner am amgylchiadau o'r fath cyn i'r penderfyniad gael ei wneud, ni ellir cyfeirio at yr amgylchiadau hynny yn ddiweddarach fel rheswm dros gynnal adolygiad. 

Gall yr Ail Swyddog Uniondeb Academaidd roi cosb yn unol â'r canlynol:

• Y cosbau sydd ar gael ar gyfer camymddygiad academaidd mewn amodau arholiad (gweler 5.1)
• Y cosbau sydd ar gael ar gyfer camymddygiad academaidd mewn amodau heblaw am arholiad (gweler 5.2)
• Y cosbau sydd ar gael ar gyfer camymddygiad academaidd mewn dysgu annibynnol cyfeiriedig mewn graddau ôl-raddedig a addysgir/graddau ymchwil (gweler 5.3)

Bydd cosbau'n cael eu nodi ar gofnod academaidd y myfyriwr.

4.8 Cofnod o'r Achos

Bydd Swyddog(ion) Uniondeb Academaidd y Gyfadran/yr Ysgol/y Sefydliad Partner yn cofnodi pob achos, gan nodi a brofwyd yr honiad, unrhyw gosb a roddwyd a'r rhesymau dros y penderfyniadau a wnaed. Bydd cofnod parhaol o'r achos yn cael ei gadw a gellir ystyried hwn mewn adolygiadau terfynol o achosion. Bydd y cofnod o'r achos ar gael i'r myfyriwr (gweler 4.9 isod).

4.9 Hysbysu'r myfyriwr

Dylai'r Gyfadran/yr Ysgol/y Sefydliad Partner roi gwybod i'r myfyriwr yn ysgrifenedig a brofwyd yr honiad ac am unrhyw gosb a roddwyd. Bydd y cofnod o'r achos ar gael i'r myfyriwr hefyd.

Caiff y myfyriwr ei hysbysu hefyd am Weithdrefn Adolygiad Terfynol y Brifysgol. Fodd bynnag, dylai myfyrwyr sylwi y gallai adolygiad terfynol o'r canlyniad arwain at gosb mwy llym (e.e. os caiff y canlyniad presennol ei ddiddymu a chaiff yr achos ei gyfeirio ar gyfer ymchwiliad a phenderfyniad newydd). 

Pan fo honiad wedi ei brofi, a phan fo’r Gyfadran/yr Ysgol/y Sefydliad Partner yn pryderu y gall hyn effeithio ar addasrwydd y myfyriwr i ymarfer, gellir cyfeirio’r achos hefyd at y Dirprwy Is-ganghellor a Deon Gweithredol (neu ei enwebai) yn unol â Rheoliadau'r Brifysgol ynghylch Addasrwydd i Ymarfer.

Pan brofwyd honiad ac mae'r myfyriwr eisoes wedi'i gofrestru gyda chorff proffesiynol, statudol neu reoleiddiol (er enghraifft, cofrestru gyda'r Cyngor Meddygol Cyffredinol), mae'r myfyriwr yn gyfrifol am hysbysu'r corff proffesiynol am ganlyniad y Pwyllgor Ymchwilio.

Dylai'r Ail Swyddog Uniondeb Academaidd roi un o'r cosbau canlynol:

5.1 Y cosbau sydd ar gael ar gyfer tramgwyddau mewn arholiadau

5.1.1    

Rhoi rhybudd ysgrifenedig i'r ymgeisydd; dylid cadw cofnod o'r rhybudd;

5.1.2    

Diddymu marciau'r ymgeisydd ar gyfer y papur arholiad;

5.1.3    

Diddymu marciau'r ymgeisydd yn y modiwl dan sylw;

5.1.4      

Diddymu marciau’r ymgeisydd yn holl fodiwlau’r lefel astudio benodol;

5.1.5    

Diddymu marciau'r ymgeisydd yn holl fodiwlau’r lefel astudio benodol a gwahardd yr ymgeisydd rhag sefyll unrhyw arholiadau yn y Brifysgol yn y dyfodol;

5.2 Y Cosbau sydd ar gael ar gyfer tramgwyddau heblaw am mewn arholiadau modiwlau a addysgir

5.2.1      

Rhoi cerydd ffurfiol i’r ymgeisydd a nodi y dylid anwybyddu’r testun wrth farcio, gan arwain at farc is (pan fo hynny'n berthnasol);

5.2.2    

Diddymu marciau'r ymgeisydd am yr aseiniad;

5.2.3    

Diddymu marciau'r gydran o'r modiwl;

5.2.4    

Diddymu marciau'r ymgeisydd yn y modiwl dan sylw;

5.2.5      

Diddymu marciau’r ymgeisydd yn holl fodiwlau’r lefel astudio benodol;

5.2.6    

Diddymu marciau'r ymgeisydd yn holl fodiwlau’r lefel astudio benodol a gwahardd yr ymgeisydd rhag sefyll unrhyw arholiad yn y Brifysgol yn y dyfodol.

5.3 Y Cosbau sydd ar gael ar gyfer dysgu annibynnol cyfeiriedig ar raddau meistr ôl-raddedig a addysgir a thraethodau ymchwil ôl-raddedig

5.3.1    

Dyfarnu penderfyniad Methu i'r ymgeisydd â hawl i ailgyflwyno;

5.3.2    

Dyfarnu penderfyniad Methu i'r ymgeisydd, heb hawl i ailgyflwyno.

6.1

Os bydd goruchwyliwr/arholwr yn ystyried neu'n amau y cafwyd camymddygiad academaidd mewn perthynas â thraethawd ymchwil gradd ymchwil ar ôl ei chyflwyno'n ffurfiol, bydd yn rhoi gwybod am y mater yn ysgrifenedig i Swyddog Uniondeb Academaidd y Gyfadran/yr Ysgol/Sefydliad Partner cyn gynted â phosibl. 

Mewn achosion lle caiff y camymddygiad academaidd honedig ei nodi ar ôl cyflwyniad ffurfiol ond cyn yr arholiad llafar, dylai'r broses arholi gael ei gohirio nes bod yr ymchwiliad i'r camymddygiad academaidd wedi’i gwblhau. Dylid rhoi gwybod yn ysgrifenedig i'r myfyriwr (fel arfer o fewn saith niwrnod i nodi’r pryderon) bod pryderon ynghylch camymddygiad academaidd, a bod y broses arholi wedi'i gohirio wrth i ymchwiliad i’r mater gael ei gynnal. Dylid rhoi gwybod i'r Gyfadran/yr Ysgol a phanel yr arholiad llafar (os yw wedi cael ei benodi) hefyd.

Mewn achosion pan fo camymddygiad academaidd wedi ei nodi yn ystod yr arholiad llafar, dylid gohirio’r Bwrdd Arholi a rhoi gwybod i'r Gyfadran/yr Ysgol. Dylid rhoi gwybod i'r myfyriwr wyneb yn wyneb yn yr arholiad llafar ac yn ysgrifenedig o fewn saith niwrnod bod honiad o gamymddygiad academaidd , a bod y broses arholi wedi'i gohirio wrth i ymchwiliad gael ei gynnal i'r pryderon.

Gall yr academydd sy'n cyfeirio fod yn oruchwyliwr neu’n arholwr (neu enwebai). Gall yr academydd sy'n cyfeirio ei gwneud yn ofynnol i'r myfyriwr gymryd rhan mewn arholiad llafar uniondeb academaidd i brofi gwybodaeth y myfyriwr am y gwaith a gyflwynwyd cyn rhoi gwybod am y mater i'r Swyddog Uniondeb Academaidd, yn unol â 3.1 uchod.

Yn dilyn yr arholiad llafar uniondeb academaidd, dylai cadeirydd panel yr arholiad llafar baratoi adroddiad sy’n amlinellu ei gasgliadau o fewn wythnos i arholiad llafar uniondeb academaidd y myfyriwr yn unol â 3.1. Dylai'r adroddiad hwn gael ei gyfeirio at sylw’r Swyddog Uniondeb Academaidd a fydd yn ystyried yr adroddiad ochr yn ochr â dogfennaeth/tystiolaeth arall.

Efallai bydd yr academydd sy'n cyfeirio’n dymuno ystyried y dystiolaeth ganlynol (bydd hyn yn dibynnu ar natur y pryderon ynghylch camymddygiad academaidd):

Adroddiad Turnitin

Ffynonellau anodedig sy'n cyfateb i'r traethawd ymchwil

Datganiadau gan y goruchwyliwr/cadeirydd panel yr arholiad llafar/arholwr mewnol/arholwr allanol/academydd arall. Mewn rhai achosion, gall fod yn briodol cysylltu ag arbenigwr pwnc allanol/mewnol i ofyn am ei asesiad o’r achos.

Adroddiad arholiad llafar uniondeb academaidd, os yw’n briodol.

Datganiadau trydydd parti (os yw’n berthnasol ac os yw’r trydydd parti wedi ildio ei hawl i fod yn ddienw).

Nid yw'r rhestr hon yn gynhwysfawr.

6.2

Ar ôl derbyn yr atgyfeiriad cychwynnol, bydd Swyddog Uniondeb Academaidd y Gyfadran/yr Ysgol/y Sefydliad Partner yn ystyried yr holl dystiolaeth. Gall y Swyddog Uniondeb Academaidd ofyn am ragor o wybodaeth. Er enghraifft, gall ofyn bod arholiad llafar uniondeb academaidd yn cael ei gynnal i brofi gwybodaeth y myfyriwr am y gwaith a gyflwynwyd neu fod arbenigwr pwnc annibynnol yn cael ei benodi i gynnal asesiad.

Os yw'r honiad yn ymwneud â thraethawd ymchwil ôl-raddedig, mae'n rhaid i'r Ysgol/y Gyfadran/y Sefydliad Partner gyfweld â'r myfyriwr dan sylw.

Ymdrinnir ag achosion ar y cyd (tramgwyddau cyntaf) sy'n cynnwys myfyrwyr o’r Coleg, Prifysgol Abertawe, ar raglenni nad ydynt wedi'u hintegreiddio, a myfyrwyr o Brifysgol Abertawe a/neu fyfyrwyr o’r Coleg, Prifysgol Abertawe, ar raglenni sydd wedi'u hintegreiddio, yn unol â gweithdrefnau Prifysgol Abertawe.

Os yw achosion yn ymwneud â myfyrwyr o’r Coleg, Prifysgol Abertawe, ar raglenni nad ydynt wedi'u hintegreiddio yn unig, bydd Y Coleg, Prifysgol Abertawe, yn ymdrin â nhw.

Mewn achosion ar y cyd y mae’r Brifysgol yn ymdrin â nhw, gellir cynnwys cynrychiolydd o'r Coleg, Prifysgol Abertawe, yn ystod camau 2 i 5 (gweler 4.2 i 4.7).

8.1 Camau Cychwynnol

Os ceir honiad o gamymddygiad academaidd ar ôl i ddyfarniad gael ei roi, bydd y Brifysgol yn ystyried yr achos yn unol â'r rheoliadau sy'n ymwneud â diddymu dyfarniad.

I ddechrau, bydd Prif Swyddog Uniondeb Academaidd y Gyfadran yn ystyried y dystiolaeth, a bydd naill ai'n cau'r achos neu'n cadarnhau bod achos prima facie o gamymddygiad academaidd yn bodoli. Yna, bydd y Prif Swyddog Uniondeb Academaidd yn cyfeirio'r achos at sylw'r Is-ganghellor neu ei enwebai (Dirprwy Is-ganghellor fel arfer) a fydd yn ystyried y cais i sefydlu Pwyllgor Ymchwilio. Wrth wneud penderfyniad, bydd yr Is-ganghellor neu ei enwebai yn ystyried y dystiolaeth sydd ar gael i brofi'r achos, yr amser a aeth heibio ers y tramgwydd honedig a buddiannau ehangach y Brifysgol. Os yw achos prima facie yn bodoli, bydd yn gofyn bod Pwyllgor Ymchwilio yn cael ei sefydlu i glywed yr achos. 

Dylid cynnal y Pwyllgor Ymchwilio yn unol â'r rheoliadau isod. Os caiff achos ei brofi, bydd y Pwyllgor yn cyflwyno argymhelliad i'r Senedd ar y canlyniad ac unrhyw gosb i'w rhoi. 

8.2 Sefydlu Pwyllgor Ymchwilio'r Brifysgol i ymdrin ag achosion o gamymddygiad academaidd pan fydd dyfarniad wedi cael ei roi

8.2.1  

Wrth dderbyn cadarnhad o benderfyniad bod achos prima facie yn bodoli gan Brif Swyddog Uniondeb Academaidd y Gyfadran, gwneir trefniadau i Bwyllgor Ymchwilio priodol gael ei gynnull cyn gynted ag sy'n rhesymol bosib, fel arfer ymhen 90 o ddiwrnodau ar ôl i'r honiad gael ei wneud. Pan fo oedi, dylid hysbysu'r myfyriwr am gynnydd yr ymchwiliad, gan gynnwys y rhesymau dros yr oedi, a dylid darparu amserlen arfaethedig ar gyfer dod i gasgliad am yr achos. Fel arfer, bydd aelod o staff y Gwasanaethau Addysg yn gweithredu fel Ysgrifennydd y Pwyllgor. 

8.2.2

Bydd Panel pob Pwyllgor Ymchwilio yn cynnwys tri aelod (wedi'u dewis gan Ysgrifennydd y Pwyllgor), sef Cadeirydd profiadol a dau aelod o staff academaidd y Brifysgol.

Yn achos honiad sy'n ymwneud â myfyriwr o Sefydliad Partner, gall y Pwyllgor Ymchwilio gynnwys pedwerydd aelod o'r Panel, sy'n aelod o staff y Sefydliad Partner hwnnw, fel arfer Cyfarwyddwr y Sefydliad Partner neu ei enwebai.

Bydd Panel y Pwyllgor yn cyrraedd penderfyniad drwy bleidlais fwyafrifol aelodau'r panel, a bydd pleidleisiau'r aelodau unigol yn cael eu trin yn gyfrinachol. Os ceir nifer cyfartal o bleidleisiau o blaid ac yn erbyn, bydd gan y Cadeirydd bleidlais fwrw ychwanegol.

8.2.3  

Cyn gynted ag sy’n rhesymol ymarferol ar ôl penodi’r Pwyllgor Ymchwilio, a chan gofio disgwyliad y Brifysgol y dylid clywed achosion o’r fath fel rheol o fewn 90 o ddiwrnodau calendr i'r honiad gael ei wneud, bydd yr Ysgrifennydd yn:

• Anfon copïau o ddatganiadau tystion at yr ymgeisydd, ynghyd ag unrhyw dystiolaeth arall i'w chyflwyno i'r Pwyllgor Ymchwilio, a chynnig cyfle i'r ymgeisydd i nodi unrhyw ddatganiad neu ddogfennau nad yw'n cytuno â nhw;
• Rhoi gwybod i aelodau’r Pwyllgor Ymchwilio am ddyddiad, lleoliad ac amser y cyfarfod a darparu iddynt gopïau o’r honiad ac unrhyw ddatganiadau neu ddogfennau.

Bydd yr Ysgrifennydd, ar yr un pryd, yn rhoi gwybod i’r ymgeisydd am ddyddiad ac amser cyfarfod y Pwyllgor Ymchwilio a bod ganddo hawl i ddod â rhywun gydag ef. Fel arfer, caiff y Pwyllgor Ymchwilio ei gynnal yn electronig drwy fideo-gynadledda a disgwylir i bawb droi eu gwe-gamerâu ymlaen. Mae hawl gan fyfyriwr i ddod â chyfieithydd ar y pryd os yw'n teimlo na fydd yn gallu deall y drafodaeth yn llawn. Cyfrifoldeb y myfyriwr yw trefnu cyfieithydd o'r fath a thalu ei ffïoedd (ac eithrio cyfieithu Cymraeg; gweler 8.2.7 isod).  Bydd y myfyriwr yn rhoi gwybod i’r Ysgrifennydd am enw’r cyfieithydd ar y pryd cyn y cyfarfod. Mae rôl y cyfieithydd ar y pryd yn gyfyngedig i gyfieithu deialog rhwng y partïon; ni chaiff ateb cwestiynau ar ran y myfyriwr nac ychwanegu unrhyw sylwadau ei hun, oni bai y caiff ei wahodd gan y Cadeirydd i wneud hynny.

8.2.4              

Dylid anfon unrhyw dystiolaeth ddogfennol i’w chyflwyno o blaid y myfyriwr at y Gwasanaethau Addysg cyn dyddiad y cyfarfod a’i chylchredeg i aelodau’r Pwyllgor. Bydd angen i’r ymgeisydd roi gwybod i’r Ysgrifennydd a yw’n bwriadu bod yn bresennol yng nghyfarfod y Pwyllgor Ymchwilio ai peidio. Os bydd yr ymgeisydd yn nodi nad yw’n dymuno bod yn bresennol yn y cyfarfod, bydd y Pwyllgor Ymchwilio’n bwrw ymlaen yn ei absenoldeb. Fel arfer, ni chaiff myfyriwr anfon rhywun arall i’r cyfarfod yn ei le, oni bai bod y Cadeirydd yn awdurdodi hynny cyn y cyfarfod. Na cheir ymateb gan y myfyriwr ar ôl gwneud pob ymdrech i gysylltu ag ef, cynhelir y cyfarfod yn ei absenoldeb. Mewn amgylchiadau eithriadol, gellir gohirio'r cyfarfod unwaith. 

Gellir cyflwyno unrhyw dystiolaeth ychwanegol a ddarperir ar ddyddiad y cyfarfod i'r Pwyllgor, ond dim ond â chaniatâd penodol y Cadeirydd.  

8.2.5

Nid oes rhaid i'r Pwyllgor ystyried bwriad mewn perthynas â honiad o gamymddygiad academaidd; nid yw honni y cyflawnwyd y tramgwydd yn anfwriadol neu'n ddamweiniol yn dderbyniol fel amddiffyniad. Fodd bynnag, gall y myfyriwr gyflwyno amgylchiadau o’r fath fel amgylchiadau lliniarol mewn perthynas â’r gosb i’w rhoi.

8.2.6

Er y bydd cyfarfodydd y Pwyllgor fel arfer yn cael eu cynnal drwy fideogynadledda, pe bai cyfarfod yn cael ei gynnal wyneb yn wyneb, dylid ei gynnal ym Mhrifysgol Abertawe oni chytunwyd ar reoliadau amgen (e.e. i'r cyfarfod gael ei gynnal ar gampws Partner Cydweithredol).

8.2.7

Cynhelir gwrandawiadau'r Pwyllgor yn Saesneg neu, ar gais myfyriwr, yn Gymraeg. Dylai myfyrwyr sy’n dymuno i'r gwrandawiad gael ei gynnal yn Gymraeg roi gwybod i’r Ysgrifennydd, wrth dderbyn dyddiad y gwrandawiad, er mwyn i Swyddfa Iaith Gymraeg y Brifysgol drefnu gwasanaeth cyfieithu. Darperir gwasanaethau o'r fath yn ddi-dâl i'r myfyriwr.

8.2.8

Dylid hysbysu’r myfyriwr am ei hawl i ddod â rhywun gydag ef i'r cyfarfod. Dylai myfyriwr sy'n bwriadu dod â rhywun gydag ef hysbysu Ysgrifennydd y Pwyllgor yn ysgrifenedig am yr unigolyn a fydd yn dod gydag ef cyn y Pwyllgor. 

Gall myfyrwyr ofyn am gael dod â chynrychiolydd cyfreithiol gyda nhw. Mewn achosion o'r fath, dylai'r myfyriwr gyflwyno cais i Gyfarwyddwr y Gwasanaethau Addysg. Mae gan Gyfarwyddwr y Gwasanaethau Addysg y disgresiwn llwyr i dderbyn neu wrthod cais a bydd ei benderfyniad yn derfynol.

Os caniateir i'r myfyriwr ddod â chynrychiolydd cyfreithiol gydag ef, caiff natur y cyfarfod ei hegluro i'r unigolyn hwnnw, h.y. nid yw'n broses gyfreithiol ac ni chaiff ei chynnal felly. Caiff y Cadeirydd wahodd cyfraniadau gan yr unigolyn sy’n dod gyda’r myfyriwr.

8.2.9    

Os na fydd ymgeisydd yn dod i gyfarfod y Pwyllgor Ymchwilio, ar ôl hysbysu’r Ysgrifennydd yn flaenorol y byddai’n bresennol, ar yr amod y gwnaed pob ymdrech resymol i gysylltu â’r ymgeisydd, cynhelir y cyfarfod yn ei absenoldeb.

8.3 Swyddogaethau'r Pwyllgor Ymchwilio a'r drefn i'w dilyn yn ystod y cyfarfod pan fydd dyfarniad wedi'i roi.

8.3.1

Swyddogaethau'r Pwyllgor Ymchwilio fydd:

• Ystyried y dystiolaeth a gyflwynwyd iddo mewn perthynas â’r honiad o gamymddygiad academaidd
• Penderfynu a yw'r honiad wedi cael ei brofi
• Penderfynu, mewn achosion priodol, ar y gosb i'w rhoi

8.3.2

Yn amodol ar y weithdrefn a amlinellir isod, bydd Ysgrifennydd a Chadeirydd y Pwyllgor yn penderfynu ar drefn y cyfarfod. Gall yr Ysgrifennydd/Cadeirydd bennu terfynau amser ar gyfer sylwadau'r partïon/tystion. 

Mae gan y Cadeirydd yr awdurdod i ystyried gohirio neu derfynu'r cyfarfod ar gais y myfyriwr neu aelodau'r Panel, neu os yw'r Cadeirydd o'r farn bod angen ei ohirio/derfynu.       

Mewn achosion pan gyhuddir dau neu fwy o ymgeiswyr o dramgwyddau cysylltiedig, megis yn achos cydgynllwynio, gall y Cadeirydd benderfynu ymdrin â'r achosion gyda'i gilydd. Fodd bynnag, mae'n rhaid rhoi cyfle i bob ymgeisydd ofyn i'r achosion gael eu clywed ar wahân.  Cadeirydd fydd yn penderfynu ar hyn.

8.3.3

Bydd y Cadeirydd yn:

• Cyflwyno ei hun ac unrhyw staff ychwanegol i'r myfyriwr
• Esbonio pwrpas y Panel a'r canlyniadau posib
• Hysbysu'r myfyriwr am yr honiad a chrynhoi tystiolaeth/ffeithiau'r achos
• Hysbysu'r myfyriwr y bydd y Panel yn holi'r myfyriwr ac unrhyw dystion
• Rhoi cyfle i'r myfyriwr a/neu ei gynrychiolwyr ymateb i'r honiad ac amlinellu ei achos
• Rhoi cyfle i'r myfyriwr gyflwyno unrhyw dystiolaeth mae wedi dod â hi i'r cyfarfod 
• Asesu dealltwriaeth y myfyriwr o uniondeb academaidd a chamymddygiad academaidd
• Pan fo'n briodol, gofyn i'r myfyriwr a yw'n dymuno cynnig unrhyw amgylchiadau lliniarol. Bydd hefyd yn atgoffa'r myfyriwr na fydd modd cyfeirio at yr amgylchiadau hynny’n hwyrach fel rheswm dros adolygiad os gallai fod wedi tynnu amgylchiadau o'r fath at sylw’r Panel cyn i’r penderfyniad gael ei wneud
• Darparu gwybodaeth i'r myfyriwr ynghylch y llinell amser ar gyfer ei benderfyniad a'r hawl i apelio yn erbyn y penderfyniad hwnnw

8.3.4

Er gwaethaf y ffaith bod hawl gan y myfyriwr i ddod â chynrychiolydd i gyfarfod y Pwyllgor, bydd y Panel yn dymuno clywed yn uniongyrchol gan y myfyriwr, yn ei eiriau ei hun, a bydd yn disgwyl i'r myfyriwr (nid y person sydd wedi dod gyda'r myfyriwr) ateb cwestiynau.

8.3.5

Caiff tystion ymwneud â thystiolaeth sy'n berthnasol yn uniongyrchol i’r honiad yn unig ac fel arfer, byddant yn gadael y cyfarfod ar ôl cael eu holi. Gall y Cadeirydd ystyried caniatáu i dystion aros yn y gwrandawiad drwy gydol y drafodaeth ar yr amod bod y ddau barti yn cytuno i hyn ymlaen llaw, neu os yw'r Cadeirydd yn ystyried ei bod hi'n berthnasol i'r achos bod tyst yn aros.

8.3.6

Ni chaniateir cyflwyno tystiolaeth ddogfennol ychwanegol i'r Pwyllgor ar ddiwrnod y gwrandawiad ond â chaniatâd penodol y Cadeirydd.  

8.3.7

Pan fydd y dystiolaeth wedi'i chyflwyno a'r tystion wedi'u holi, bydd pawb heblaw am aelodau'r Pwyllgor, yr Ysgrifennydd ac aelodau eraill o staff y Gwasanaethau Addysg sy'n bresennol, yn gadael.

8.3.8

Gall Cadeirydd y Pwyllgor gymeradwyo cais i ohirio'r gwrandawiad yn dilyn cais rhesymol gan y myfyriwr neu gan y Pwyllgor ei hun. Er enghraifft er mwyn cael rhagor o dystiolaeth, megis tystiolaeth ddogfennol i ategu datganiad llafar a wnaed neu i brofi gwybodaeth myfyriwr am y gwaith dan sylw os ceir ansicrwydd o hyd ai’r myfyriwr yw awdur y gwaith.

8.3.9

Yna bydd y Pwyllgor Ymchwilio yn ystyried, yn seiliedig ar y dystiolaeth, a yw'r honiad wedi'i brofi. Bydd baich y prawf (sef y ddyletswydd i brofi’r honiad) ar y Brifysgol, a dylai safon y prawf fod yn seiliedig ar bwysau tebygolrwydd: caiff ffaith ei chadarnhau os yw’n fwy tebygol ei bod wedi digwydd na pheidio.  

8.3.10

Fel arfer, ni fydd y Pwyllgor Ymchwilio yn cael gwybod, cyn gwneud ei benderfyniad ar yr honiad dan sylw, am unrhyw dystiolaeth o honiadau o gamymddygiad academaidd a brofwyd o'r blaen; dylid hysbysu'r Pwyllgor o'r fath achosion cyn iddynt benderfynu ar y gosb mewn achosion priodol.

Fodd bynnag, mewn achosion eithriadol, gellir datgelu tystiolaeth am gyhuddiadau blaenorol o gamymddygiad academaidd a brofwyd cyn i’r Pwyllgor benderfynu ar ddyfarniad pan fo tystiolaeth o’r fath:

• Yn gwrthddweud honiad o gymeriad blaenorol da a wnaed gan yr ymgeisydd/ei gynrychiolydd
• Yn berthnasol i'r honiad dan sylw (yn hytrach na dangos yn unig fod gan yr ymgeisydd y cymeriad i gyflawni'r gweithredoedd a honnir) ac ar yr amod nad yw ei heffaith ragfarnus yn drech na'i gwerth fel tystiolaeth.

8.3.11

Nid oes rhaid i'r Pwyllgor ystyried bwriad. Fodd bynnag, gellir ystyried lliniaru mewn perthynas â'r gosb.

8.3.12  

Os yw'r Pwyllgor yn canfod bod yr achos wedi'i brofi, bydd wedyn yn ystyried y gosb i'w rhoi. Ceir rhestr lawn o'r cosbau sydd ar gael yn adran 8.4.

Caiff y myfyriwr gyfle i wneud sylwadau ynghylch y canlyniad a chyflwyno unrhyw amgylchiadau lliniarol, cyn i'r Panel benderfynu ar gosb neu ganlyniad priodol. Rhaid i ymgeiswyr sy'n cyflwyno amgylchiadau lliniarol ddarparu tystiolaeth i ategu’r amgylchiadau a darparu eglurdeb ar eu heffeithiau. Pan allai'r ymgeisydd fod wedi rhoi gwybod am amgylchiadau o'r fath i’r Pwyllgor cyn i’r penderfyniad gael ei wneud, ni ellir cyfeirio at yr amgylchiadau hynny yn ddiweddarach fel rheswm dros gynnal adolygiad. Caiff y Cadeirydd wahodd cyfraniadau gan y person sy’n dod gyda’r myfyriwr.

8.3.13

Os yw'r Pwyllgor yn casglu nad yw'r achos wedi'i brofi, hysbysir yr ymgeisydd am y canlyniad yn ysgrifenedig. Bydd pob cofnod o'r achos yn cael ei ddileu o ffeil y myfyriwr.

8.4 Y cosbau sydd ar gael i'r Pwyllgor Ymchwilio mewn achosion o gamymddygiad academaidd pan fydd dyfarniad wedi'i roi

8.4.1  

Dylai’r Pwyllgor ystyried y Côd Ymarfer ar gyfer Camymddygiad Academaidd, hanes yr achos a chofnod academaidd y myfyriwr cyn rhoi cosb. Er mwyn sicrhau cysondeb wrth roi cosbau, mae'r Brifysgol yn darparu canllawiau ar gosbau yn y Côd Ymarfer ar Gamymddygiad Academaidd (gweler yr Atodiad). Fodd bynnag, bydd y Pwyllgor hefyd yn ystyried goblygiadau'r gosb ar gyfer y myfyriwr, ei fwriad ac unrhyw amgylchiadau lliniarol.  Dylai’r Pwyllgor fod yn argyhoeddedig bod gan yr amgylchiadau lliniarol berthynas uniongyrchol â’r achos ac yn benodol eu bod wedi dylanwadu ar weithredoedd y myfyriwr neu'r myfyrwyr dan sylw. Dyma'r rhestr lawn o'r cosbau sydd ar gael i'r Pwyllgor Ymchwilio:

8.4.2    

Diddymu marciau'r ymgeisydd ar gyfer modiwl cyfan neu ran ohono;

8.4.3      

Diddymu marciau’r ymgeisydd ym mhob un o’r modiwlau ar gyfer y lefel astudio benodol;

8.4.4    

Gwahardd yr ymgeisydd rhag sefyll unrhyw arholiad yn y dyfodol;

8.4.5    

Diddymu marciau'r ymgeisydd ym mhob un o'r modiwlau ar gyfer y lefel astudio benodol a gwahardd yr ymgeisydd rhag sefyll unrhyw arholiad yn y dyfodol;

8.4.6    

Tynnu un dosbarth oddi wrth y radd, neu ddiddymu rhagoriaeth*, fel y bo'n briodol;

*Mae rhagoriaeth yn cyfeirio at unrhyw ddosbarthiad sydd ar gael i’r dyfarniad, gan gynnwys rhagoriaeth/teilyngdod/clod, etc.

8.4.7  

Os bydd y Pwyllgor yn penderfynu bod y cosbau uchod yn amhriodol, caiff y Pwyllgor ddefnyddio ei ddisgresiwn i benderfynu ar gosb briodol.

Pan fo honiad wedi’i brofi a gallai hyn effeithio ar addasrwydd yr ymgeisydd i ymarfer, gall yr achos hefyd gael ei gyfeirio at y Deon Gweithredol priodol neu ei enwebai yn unol â Rheoliadau Addasrwydd i Ymarfer y Brifysgol.

Pan fo honiad wedi’i brofi ac mae'r myfyriwr eisoes wedi'i gofrestru gyda chorff proffesiynol, statudol neu reoleiddiol (er enghraifft, cofrestru gyda'r Cyngor Meddygol Cyffredinol), mae'r myfyriwr yn gyfrifol am roi gwybod i'r corff proffesiynol am ganlyniad y Pwyllgor Ymchwilio, pan fo hynny'n briodol.

8.5 Gwneud Iawn a Chapio

Os yw'r Pwyllgor yn penderfynu gweithredu 8.4.2 ac 8.4.3, bydd y Pwyllgor hefyd yn ystyried a ddylid caniatáu i'r ymgeisydd wneud iawn am y gwaith dan sylw i gael marc wedi'i gapio, yn unol â rheoliadau asesu'r rhaglen astudio.

8.6  Camau i'w cymryd yn dilyn y Pwyllgor Ymchwilio mewn achosion sy'n dod i'r amlwg ar ôl i ddyfarniad gael ei roi

8.6.1

Pan fydd y Pwyllgor Ymchwilio wedi ymchwilio i ffeithiau'r camymddygiad academaidd honedig, yn ei adroddiad, bydd yr Ysgrifennydd yn nodi a brofwyd yr honiad ai peidio a bydd yn nodi unrhyw gosb i'w rhoi. Dylid cyflwyno'r adroddiad i'r Senedd cyn gynted â phosib ar ôl i'r Ymchwiliad gael ei gwblhau.  

8.6.2  

Dylid hysbysu'r myfyriwr am ganlyniad y gwrandawiad.

8.6.3  

Dylid hysbysu ymgeisydd am ei hawl i ofyn am adolygiad terfynol o'r canlyniad a bennwyd gan y Pwyllgor Ymchwilio o fewn 14 diwrnod gwaith ar ôl dyddiad y llythyr/e-bost at y myfyriwr yn cadarnhau canlyniad y Pwyllgor Ymchwilio, a hynny yn unol â gweithdrefn Adolygiad Terfynol y Brifysgol (gweler adran 9.0 isod). 

8.6.4

Fel arfer, ni fyddai'r Brifysgol yn gwneud datganiadau cyhoeddus ynghylch penderfyniadau Pwyllgorau Ymchwilio. Fodd bynnag, bydd y Brifysgol yn cadw cofnod o'r holl achosion, a fydd ar gael i'r cyhoedd ar gais. 

Wrth ymchwilio i honiadau o gamymddygiad academaidd, mae'r Brifysgol yn cadw'r hawl i ymgynghori â phrifysgolion neu sefydliadau eraill lle y bo'n briodol.

8.6.5  

Cyflwynir adroddiad i'r Senedd am ganlyniad terfynol yr achos, gan nodi unrhyw argymhellion am weithredu pellach, megis amddifadu ymgeisydd o gymhwyster neu ddiddymu'r cymhwyster, os cyfiawnheir hynny, yn ogystal â manylion unrhyw weithredu pellach megis ymchwiliad i afreolaidd-dra wrth gynnal yr achos. Bydd y Senedd yn gwneud penderfyniad ar yr achos, gan gynnwys penderfyniad i amddifadu unigolyn o gymhwyster neu ddirymu cymhwyster os oes cyfiawnhad dros hynny.

Hysbysir myfyrwyr bod ganddynt hawl i ofyn am adolygiad terfynol o'r canlyniad ym mhob achos o gamymddygiad academaidd, yn unol â gweithdrefnau'r Brifysgol ynghylch Adolygiad Terfynol.

Rhaid cyflwyno ceisiadau am Adolygiad Terfynol i Gyfarwyddwr y Gwasanaethau Addysg o fewn 14 diwrnod gwaith ar ôl dyddiad y llythyr/e-bost at y myfyriwr yn cadarnhau canlyniad yr achos o gamymddygiad academaidd, yn unol â'r Weithdrefn Adolygiad Terfynol. Dylai myfyrwyr sylwi y gallai adolygiad terfynol o'r canlyniad arwain at gosb mwy llym (e.e. os caiff y canlyniad presennol ei ddiddymu a'r achos ei gyfeirio am benderfyniad newydd).

Caiff adroddiad blynyddol am faterion camymddygiad academaidd ei gyflwyno i'r Bwrdd Achosion Myfyrwyr.